Pētootēn ākōō nyooyataa kaat
17
1 Kumwoochi :Yēēsu kiineetanichiich kilē, “Tukun choo irēy piich kupētyō kupa ku-iriisōōt. Aku nyuun, ng'woonchinii chiich nyoo irēy ng'aleechoochēē ku-iriisyō. 2 Rookēē :chiichoonēē /kēērāti kaat korpopar /ākēēwiirchi araaray, kusiir yoo kātā-irēy chiich nyoo takukuskus kaaraneenyiin kupēt. 3 Āriip keey nyuun!Nēē iruun :tuupchēēng'uung' ng'ālyoon nyaa ra, ipkoong'. Ki nēē wala, inyōōchi kaat. 4 Ki nēē iruun ng'al chaa raacheen āsip tisap nkōō pērēētēk akuchō āsip tisap kilē kaawalee, inyōōchi kaat.”
Kaarana
5 Nēē mii lētuun, kumwoochi *:kāāyooytooyiik Yēēsu kilē, “Kiptaayaan, tāswēēch kaaranēēnyoon.” 6 Kuwālchi :Yēēsu kilē, “Ntā āting'ēy kaarana mpō nyoo mining' kilēē kōsuryoontoo *aritaali, toomwoochinii :mookong'wooni kilē, ‘Ng'usa iriinēkuuk akiiwēētooti keey araaray’ akutēērwook.”
Pāyit nyēpō kipāyityoon
7 Kitas taay :Yēēsu kumwoochi kooyooytooyiichiich kilē, “Ntā ting'ēy :chiich nkōō akwaan kipāyityoonteenyiin nyoo roong'ēy kēēchiir ntā ku nyoo pāliisyēy. Nēē chōōnō par kirōōtu kaaw oo, imwoochinii kilē, ‘Tēpēē ng'wēny ākii-āmiisyō kilē weel’? 8 Acha sōō! Imwoochinii kupayin kupōk si nēē waang', ku-āmiisyō inyeentee lētuun. 9 Aku mēēlē kumwoochinii kipāyityoon kōōnkēy, āmu kir nyoo mii ku-irēy, ku kir nyoo kumwoochinii ku-ir. 10 Lēē nyoonēē mpō nkōō wōloo āmiikwaan. Nēē a-ir kir aka tōkōl kilēē paani kākimwoorwook, amwaa kilē, ‘Mēērookēē /kēēlooswēēch. Kichaan kipāyitiin choo ki-irēy pāyiisyēēnyoon.’ ”
Kuusoopēy :Yēēsu piich taman choo kyaam :kōōnchēryoontō
11 Paani kiimii :Yēēsu nkōō kiineetanichiich kuwēētii Chēērusālēēm, kuwō araa kwēēnuu kōōroo Kalilaaya ākōō *Samariya.
12 Paani mii kuwēētii kēēstoon choo kiimii yoonēē, kupka :piich choo lēē taman choo kyaam :kōōnchēryoontō kunyōōru inyeentee. Kiiryoonchō :pichoochēē nkōō yoo lōōw 13 akukuursyō kilē, “Yēēsu! Kiptaayaan, riireeneech.” 14 Paani keero :Yēēsu akwaaneek, kumwoochi kilē, “Apee āng'uutii keey *tisiik.” Kupa :pichoochēē. Nēē mii aree kupēētii, /kēēsoop.
15 Kii nēē ro :pichoochēē kilē kaakusopyō, kuwaraka :akoong'o wōli mii :Yēēsu kuuloosuuy Iriin nkōō kuut nyoo tōrōōr. 16 Kukutung' :chiichoonēē nkōō taayuu Yēēsu akumwoochi Yēēsu kōōnkēy nkōō kiyoo kaaku-irchi. Kiipō :chiichi kōōroo *Samariya. 17 Kumwa :Yēēsu kilē, “Ma kā taman :pichu kākuusoop? Mii ānō :chu lēē sokool? 18 Āmu nee sikuwaraka nyi lēē :akoong'o akuchō kuu-ōōchi Iriin kōōnkēy, aku chiich nyoo lēē toon?”
19 Kumwoochi :Yēēsu chiichoonēē kilē, “Ng'eeta akiiwēēchi keey. Kēēsop āmu kēētiirēēnoon keey.”
Wōloo chōōntooy :Pāyuunātoo Kaa Iriin
20 Kiteep *:Parisaayiik walak Yēēsu pērēētuuni chōōnēy :Pāyuunātoo Iriin. Kuwālchi :Yēēsu Parisaayiichoochēē kilē, “Moomii :kir nyoo ng'uutuuy pērēētuuni chōōnēy :Pāyuunātoo Iriin. 21 Moomii mpō :chiich nyoo mwooruuy kilē, ‘Aroo kee ānyiinō mii kuchōōnēy,’ ntā kilē, ‘Ānyiinō!’ āmu mii yēēnyi :Pāyuunātoo Kaa Iriin.”
Paani wārākēē :Yēēsu
22 Kitas taay :Yēēsu kumwoochi kiineetanichiich kilē, “Mii :pērēētuu nyoo chōōnēy nyoo āsoomēy kilē ntā koomii nkōō :aneen, *Wēēroo Chiich. Aku mēēmuukēē nyuun. 23 Mii :piich walak choo mwoorwook kilē, ‘Ānyiinō mii iinō!’ ntā kilē, ‘Ānyi mii yi!’ Amaapa kilē apaawasaataan, 24 kilēē paani ryālēy parak akuupkang' king'eeta kamasta ākoong'o ākōy kamasta aka kilēkuuy nyoonēē *Wēēroo Chiich mu pērēētuuni wārākēē. 25 Nyēpō taay nyuun, kunyarilēy kupōk akipō tukun chaa chaang' aku tay :piich chēpō pērēētuusyēchu.
26 Kārkēēyiituuy :pērēētuusyēchu wārākēē *:Wēēroo Chiich nkōō pērēētuusyēchu kiipō Noowa. 27 Kyoomiisyēy :piich akurēēsyēy aku-āpēy keey, ākōy pērēētuuni kichuutēy :Noowa nkōō piichiich mēēli. Nēē mii lētuun, kuroopēn kutaampiliil :pēr ng'wēny tōkōl akutup pichoochēē tōkōl.
28 Kārkēēyiituuy mpō nkōō pērēētuus choo kiipō Lōōt. Kiitas taay :pichoochēē ku-āmiisyēy akurēēsyēy. Kyoolēy aku-āltooy tukuukwaak. Kiitōōtiisyēy, akutēēkēy kooriikwaak. 29 Kii nēē mii nyuun pērēētuuni kiwēērō :Lōōt Sotom, ku-ir :Iriin kuroong'u keey :ma ākōō korin choo kiilārō mu parak kilēē roop. Kiiwaang' :mayoonēē piich tōkōl. 30 Ku lēkuuy nyuun nyoonēē :pērēētuuni /kung'oong'uuy *Wēēroo Chiich.
31 Nēē nyōōrchi :ng'aleechu chiich kimii koonyiin saang' kuumuung'ēy, ku māwārākēē kō kuwō kimar tukuuchiich choo mii kō. Ku lēē nyoonēē mpō :chiich nyoo mii par, māwārākēē kaaw kuwō kimar kir aka tōkōl. 32 Ānkēt :akwaan akipō :cheepyoosoo Lōōt. 33 Chiich aka tōkōl nyoo kwoorēy sopoon nyēpō kōōrooni, kuupootēy *sopoon nyēpō ākōy. Ku nyoo kēētētō sopoontanyiin nkōō kōōrooni akipō aneen, kunyōōruuy *sopoon nyēpō ākōy.
34 Āmwoorwook man kilē nkōō lang'atuunoonēē, nēē mii :piich ārēēny choo mii rwoon kitōōk ākoong'o, /kēē-āpēy aka /kēēmētō aka. 35 Nēē mii :chēēpyōōsōōy ārēēny kung'oorēy par, /kēē-āpēy aka /kēēmētō aka.”a
37 Kuteep :kiineetanik Yēēsu kilē, “Kiptaayaan, iriisōōt tukuuchu nkōō ānō?” Kuwālchi :Yēēsu kilē, “Yoo mii :muusyoon, kuururuuchinii keey :motoony.”