Kipāyēy :Yēēsu piich ēlup muut
6
1 Nēē mii lētuun, kutilta :Yēēsu araaraypō Kalilaaya. /Kiikikuurēē araarayoonēē nkōō kaarinee aka Tipeerya. 2 Kutuup :piich chaa chaang' Yēēsu āmu kiikiikuurō ng'al chēpō kwōng'uut choo kii-irchi :Yēēsu piich choo kiimnyoonchootēēn. 3 Kuwō :Yēēsu kulaang' lakam akuwō kutēpō ng'wēny ākōō kiineetanichiich. 4 Kiikiikuriiku :pērēētuus chēpō *Tuumpō Pasaka nyēpō Yāwuutik.5 Paani keero :Yēēsu piich chaa chaang' choo kiimii kupkoonēy wōli mii inyeentee, kuteep Pilip kilē, “Kunyōōrchinii ānō āmiisyō nyoo kupāyēē pichu tōkōl?” 6 Kiiteep :Yēēsu Pilip ng'aleechoochēē kipaat āmu kiimārēy kuutyāmēy. Kiinkēt :inyeentee nkōō mētinyiin kiyoo kii mārēy ku-ir. 7 Kuwālchi :Pilip Yēēsu kilē, “Mpō ntā mii :yoo /ki-ālēē āmiisyō, ku māyāmēy kēēnyōōru rōōpiyō choo ku-ālchiinēē pichu tōkōl.” 8 Kumwa :kiineetanaa Yēēsu nyoo kii wēēriing'waang' Siimnyōn Pēētērō nyoo /kiikikuurēē Antereeya kilē, 9 “Mii yi :kaarāchiiniin nyoo ting'ēy makatiin muut nkōō kaaraak ārēēny choo mēnkēēchēēn, ara yāmēy :choochēē keepaya pichu tēēnō chu tōkōl?” 10 Kilēēchi :Yēēsu kiineetanichiich, “Āmwoochii piich kutēpi ng'wēny.” (Kiimii yoonēē :suusō chaa chaang'.) Kutēpi :pichoochēē tōkōl ng'wēny. Kii-itēy :murēn ēlup muut nēē kuu-iit.
11 Kunam :Yēēsu makatiinēchoochēē akumwoochi Iriin kōōnkēy, akuutētō /kēēchārchinootō pichoochēē kiitēpiisōōt ng'wēny. Kuureer kunam kaaraakik aku-ir kilēē nyoonēē. Kyaam :chiitōkōl āmiisyō kupiryoong'. 12 Paani kaakupiryoong'chō :pichoochēē, kumwoochi :Yēēsu kiineetanichiich kilē, “Aruma chu kāng'ētu, kimaakany /keeluluuk mpō tukutēēn.” 13 Paani keerum :kiineetanichoochēē, kunyir kitaseen choo lēē taman nkōō ārēēny. 14 Kii nēē ro :pichoochēē ng'aleechu pō kwōng'uut kii-ir :Yēēsu, kumwa kilē, “Man kilē *ōōrkooyoontoo Iriin :chiichi nyoo /kiikumwoorēy kilē chōōnēy ng'wēny.” 15 Kuuro :Yēēsu kilē kiimārēy :pichoochēē kunam inyeentee sikuuloochi kilēku pāytooyiin. Nkōō yoonēē, kuureer :inyeentee kulaang' lakamee kitya.
Kimānēē :Yēēsu pēr parak
Mataayo 14:22-33; Maarkō 6:45-52
16 Nēē mii pērēētuunoonēē kosoliny, kupa :kiineetanipō Yēēsu kutāchi keey araaray. 17 Kulaang' mēēli akutilta kutāchi keey Kaaparnaam. Kunam :tuurin kutoomō kuchō :Yēēsu wōli mii :akwaaneek. 18 Kichō :yoomēt nyoo nyikiis akusyōōltō pērēēk. 19 Paani kiikiikupa :kiineetanik paan nyoo kii-itēy kiilomiiteen muut ntā ku lo, kuuro Yēēsu kumii kumānēē pēr parak kuutāng'uuy wōli mii mēēlii. Kuuwāriisyō :kiineetanichoochēē kwōng'uut. 20 Kumwoochi :Yēēsu kilē, “Āmoowāriisyō! Aneen :nyēēnyi.” 21 Kucham nyuun :kiineetanichoochēē Yēēsu kuchuut mēēlii. Kuchaayta :mēēlii ku-it tapan nyēpō araaray wōli kiipēētii.
Āmiisyō :Yēēsu nyēpō sopoon
22 Paani kāwō kuyyeech :kōōrēē, kuureer kuurum keey piich chaa chaang' nkōō kamasta nyiinō aka pō araarayta. Kiinkēt kilē kii mēēli ākoong'o kipaat nyoo kiikiichō kamasoonēē akiimaawēērō :Yēēsu ākōō kiineetanichiich. 23 Kupka :mēēliinēk walak choo kiipkoonēē Tipeerya, pākuuryoonchēērō yoo kiilēēkitēē :yi kyoomēēy :piich makatyaan paani kiikaakumwoochi :Kiptaayaan Iriin kōōnkēy. 24 Kii nēē ro :piichoochēē kilē kiimoomii :Yēēsu yoonēē akiimoomii mpō kiineetanichiich, kulaang' mēēliinēchoochēē akupa Kaaparnaam kipa kuwasaata.
25 Kii nēē pākunyōōru :piich Yēēsu kumii araaray kamasta nyiinō aka, /keeteep kilē, “Koonēētiin, kee-itu āyu wōli?” 26 Kuwālchi :Yēēsu kilē, “Āmwoorwook man kilē āmiikwaan āwāsootoon āmu kaa-am makatiinēchu kookōōnook kupiryoong' :chiitōkōl. Moowāsaakwaan āmu koosōwu kaamuukaa Iriin. 27 Amaawas āmiisyō nyoo rookēy, awasa āmiisyō nyoo kōōnuuy *sopoon nyēpō ākōy. Āmiisyoonoonēē nyi kōōnook *:Wēēroo Chiich nyoo kiikuutē :Apoo Iriin kaamuuka ku-ir kilēē nyoonēē.” 28 Kuteep :piich Yēēsu kilē, “Ara mārēēch :Iriin kee-ira nee?” 29 Kuwālchi :Yēēsu pichoochēē kilē, “Kir nyoo mārook :Iriin a-ir ku nyi: Arana chiichi kiiyooku :inyeentee.” 30 Kuwālchi :pichoochēē Yēēsu kilē, “Kir nee nyēpō kwōng'uut nyoo ii-irēy keeroo sikeeraneeniin? I-irēy nee? 31 Kyaam :paapatiinēchooch maana mu suur kwēēn, kilēē paani mwoorēy :siruut chēpō Iriin kilē, ‘Kiitē ku-am āmiisyō nyoo chōōnēē parak.’† ” 32 Kumwoochi nyuun :Yēēsu pichoochēē kilē, “Akanya āmwoorwook man. Kimaapkaat sōō kilē kiikōōnook *:Muusa āmiisyō nyoo kiichōōnēē parak, :Apoonyuun nyi kōōnook āmiisyō nyēpō man kuchōōnō parak. 33 Āmiisyō nyoo kiikōōnu :Iriin ku Chiich nyoo kiichōōnō kipsēnkwēt kuchō kuusoop ng'wēny.” 34 Kumwoochi :pichoochēē Yēēsu kilē, “Kōōnēēch āmiisyoonoonēē pērēētuu aka tōkōl.” 35 Kuwālchi :Yēēsu kilē, “Aneen āmiisyoonoonēē kōōnuuy sopoon. Chiich nyoo kāchō wōli āmii ku moo-āmēy :piri. Ku chiich nyoo keeranan ku mā-āmēy :maral. 36 Koomwoorwook kilē kyaarootoon amoorānoon. 37 Chiich aka tōkōl nyoo kākōōnān :Paapaan kuchōōnēy wōloo āmii. Mookārtooy saang' chiich aka tōkōl nyoo kāchō wōloo āmii, 38 āmu kyoochōōnēē kipsēnkwēt taa-ir kiyoo mārēy :Paapaan nyoo kiiyookwoon. Mēēlē kyoochōōnēy taa-ir kiyoo āmāraa. 39 Kiyoo mārēy :Paapaan nyoo kiiyookwoon ku nyi: mārēy kumoopoot chiich mpō ākoong'o nkōō chu kiikukōōnān. Mārēy kilē ang'eeta pichoochēē meerat pērēētuuni pō lēt kunyōōru sopoon. 40 Kir nyoo mārēy :Apoonyuun ku kunyōōru :piich tōkōl choo rōōtoon akutiirēēnoon keey *sopoon nyēpō ākōy. Āng'ēētēē pichoochēē meerat pērēētuuni pō lēt.”
41 Kutoowu :kāāntōōy chēpō Yāwuutik kukwiintaan āmu kiikamwa :Yēēsu kilē, “Aneen āmiisyō nyoo kiichōōnēē kipsēnkwēt.” 42 Kimwa :pichoochēē kilē, “Mā chiichi ku Yēēsu wēēroo Chōōsēp? Kiinkēt :achaan apoonyiin ākōō eeyeenyiin. Āmu nee sikumwa :inyeentee aniin kilē kichōōnō kipsēnkwēt?” 43 Kumwoochi :Yēēsu pichoochēē kilē, “Mookwiintoochi keey. 44 Moomii :chiich nyoo chōōnēy wōloo āmii kumoo-isu :Paapaan nyoo kiiyookwoon saang'eeta chiichoonēē meerat pērēētuuni pō lēt. 45 /Kiikusir nkōō siruut chēpō *ōōrkooyiipō Iriin kilē, ‘Iriin nyoo nēētēy piich tōkōl.’† Chiich nyoo kateer akuuneet keey ng'alēēpō :Apoo, ku chōōnēy wōloo āmii. 46 Moomii :chiich nyoo kiikuuro Paapa. Aneen keey nyi āchōōnēē wōli mii :inyeentee nyoo kyaaroo. 47 Āmwoorwook man kilē chiich aka tōkōl nyoo tiirēēnoon keey kuting'ēy *sopoon nyēpō ākōy. 48 Aneen āmiisyō nyēpō sopoon. 49 Kyaam :paapatiinēkwook maana paani kiimii suur kwēēn akiimēērō. 50 Chiich nyuun nyoo kaa-am āmiisyooni chōōnēē kipsēnkwēt, ku nyōōruuy *sopoon nyēpō ākōy. 51 Aneen :āmiisyoonoonēē kichōōnō kipsēnkwēt kōōnuuy sopoon. Nēē am :chiich āmiisyooni kunyōōru *sopoon nyēpō ākōy. Āmiisyō nyoo ākōōnuuy ku pōōrtanyuun sikusop :ng'wēnyu.”
52 Kii-ir :ng'aleechu kutoowu :pichoochēē kukwiintoochi keey kilē, “Muuytooy ānō :chiichi kukōōnēēch pōōrtanyiin kee-ama?” 53 Kumwoochi :Yēēsu pichoochēē kilē, “Āmwoorwook man kilē nēē maa-am pōōrpō *Wēēroo Chiich akaaree kērētiichiich, ku moonyōōruuy *sopoon nyēpō ākōy. 54 Chiich nyoo kaa-am pōōrtanyuun akira kērētiichuuch, kuting'ēy :chiichoonēē *sopoon nyēpō ākōy. Ākoong'ēētēē pichoochēē meerat pērēētuuni pō lēt. 55 Pōōrtanyuun ku āmiisyō nyēpō man, aku tukun chēpō man choo kurēēy ku :kērētiichuuch. 56 Chiich nyoo kaa-am pōōrtanyuun akira kērētiichuuch, ku ng'ātuunēē wōloo āmii ākoong'ātuunēē wōloo mii :inyeentee. 57 Apoo nyoo sopoot nyi kiiyookwoon, ākooting'ēy sopoon āmu inyeentee nyi kiikōōnān. Ku :chiich nyuun nyoo kaa-am pōōrtanyuun kuting'ēy sopoon akipō aneen. 58 Aneen āmiisyoonoonēē kiichōōnō kipsēnkwēt. Makarkeey āmiisyoonoonēē nkōō nyoo kyoomēy :paapatiinēkwook akumēērō. Piich choo āmēy āmiisyooni ku nyōōruuy *sopoon nyēpō ākōy.” 59 Kiimwoorēy :Yēēsu ng'aleechoochēē, kumii kuunēētiisyēy mu *sinakōōki nkōō Kaaparnaam.
60 Paani kateer :kiineetanipō Yēēsu ng'aleechu, kumwa :chaa chaang' kilē, “Kōrōōmō :ng'aleechu, ng'oo nyi chāmēy?” 61 Kisōwu :Yēēsu kilē kiimii :kiineetanichiich kukwiintoonēy. Kuteep kilē, “Ara kāng'woonchook :ng'aleechuuch? 62 Kutap nee nyuun nēē aroo *Wēēroo Chiich kuwēētii wōli kiichōōnēē? 63 Kōōnuuy :Toomirmiir nyoo Tiliil sopoon, ku moomii nyuun :kir nyoo kōōnuuy :kaamuukaa kimukuulmēt. Ng'aleechu koomwoorwook kupkoonēē wōloo mii :Toomirmiir nyoo Tiliil akukōōnuuy sopoon. 64 Aku tākumii nyuun :walak nkōō akwaan choo mēērānoon.” Kiinkēt :Yēēsu kung'eetee kēny kilē kii mpō ng'oo choo kiimaaran ng'aleechiich aku kii ng'oo nyoo kiichō ku-āltooy inyeentee. 65 Kitas taay :Yēēsu kumwa kilē, “Kii kiyoonēē nyi kyoomwoorwook kilē moomii :chiich nyoo chōōnēy wōloo āmii kutoomō ku-ir :Paapaan kuchō.” 66 Kii nēē mwa :Yēēsu kilēē nyoonēē, kuuchuchuukiisyō :piich chaa chaang' choo kipēētootēy ākōō inyeentee.
67 Kiteep :Yēēsu kiineetanichiich choo kii lēē taman nkōō ārēēny kilē, “Āmārēy mpō āmētoon, sōō?” 68 Kuwālchi :Pēētērō Yēēsu kilē, “Kiptaayaan, kupēētiichaan ānō? Iting'ēē ng'al choo kōōnuuy *sopoon nyēpō ākōy. 69 Kuurānēy akēēnkēt kilē inyēēn *Meesaaya nyoo chōōnēē wōloo mii :Iriin.” 70 Kumwoochi :Yēēsu kilē, “Mā aneen nyi kyoolēwēnook :akwaan taman nkōō ārēēny? Aku *Syeetaani nyuun :akoong'o nkōō akwaan.” 71 Kimwoorēy :Yēēsu kilēē nyoonēē, ku kiing'āloolēē Chuutaas wēēroo Siimnyōn Iskaryoot nyoo kiiwō ku-alta Yēēsu aku kii :akoong'o inyeentee nkōō kiineetanik chu kii lēē taman nkōō ārēēny.