Kuung'ēētēē :Yēēsu Lasaaro meerat
11
1 Kiimnyaan :chiich aka nyoo /kiikikuurēē Lasaaro nyoo kiimāng'ēy Peetannya. Kiimāng'ēy :Maaryaa ākōō chēētang'waang' Marta yoonēē mpō. 2 Kii Maaryaa nyēēnyi nyoo kiiwō kuroonchi kēēlyēēpō Yēēsu mwaar nyoo kiing'uutooy nyaa anyiny pērēētuu aka akuupuukō puutēchiich. Kii wēēriing'waang' :Lasaaro nyi kiimnyaanaat. 3 Kuuyoochi :tiipiichoochēē Yēēsu kilē, “Kiptaayaan, mnyaanaat :choorwēēng'uung' nyoo ichāmēy.” 4 Paani kateer :Yēēsu ng'aleechoochēē, kumwa kilē, “Māmēērēē :Lasaaro kōrōōyoonēē. Acha sōō! /Kuutōrōōrēy :Iriin nkōō Wēēriinyiin kupunuunō kiyi ka-ira.”5 Kiichāmēy :Yēēsu Marta, chēētang'waang' ākōō Lasaaro. 6 Paani kateer :Yēēsu kilē kiimnyaanaat :Lasaaro, kupērēnō wōli kimii pērēētuus ārēēny. 7 Nēē mii lētuun, kumwoochi kiineetanichiich kilē, “Kēēwārākiisyēē Chuuteeya.” 8 Kilēēchi :kiineetanichiich, “Koonēētiin, imārēy warakee wōliinēē? Nku kālēēkit paani kāmārēy :kāāntōōy chēpō Yāwuutik kuwiireeniin korin.” 9 Kuwālchi :Yēēsu kiineetanichoochēē kilē, “Pērēētēk kuting'ēy saayitiis choo lēē taman nkōō ārēēny choo ku-irēy :achaan pāyit nyēpō Iriin. Ku nēē tuup nyuun :chiich oor nyēpō lēpooyin, kumēēputēy āmu rōōsēy lēpooyin nyēpō ng'wēny. 10 Ku nēē tuup :chiich araa tuurin, kuuputēy āmu māting'ēy chiichoonēē lēpooyin.” 11 Paani keewaang' :Yēēsu kumwa kilēē nyoonēē, kumwoochi pichoochēē kilē, “Kāruuchi keey :choorweenyoon Lasaaro. Āmāraa awaang'eeta rwoon.” 12 Kuwālchi :kiineetanik Yēēsu kilē, “Kiptaayaan, nēē mii rwoon :Lasaaro, kusopēy.” 13 Kiing'āloolēē :Yēēsu meeraa Lasaaro, kuupkootēy :kiineetanik kilē kiimwoorēy :Yēēsu kilē mii rwoon Lasaaro. 14 Kuupuunchi :Yēēsu kiineetanichoochēē kilē, “Kiikima :Lasaaro. 15 Apaypay :aneen kilē neena kāmoomii nkōō inyeentee. Kaamwaa kilēē nyoonēē saaranaan. Keepee wōli mii :inyeentee.” 16 Kumwoochi :Toomaas nyoo /kiikikuurēē Sārāmwō nkōō kaarinee aka kiineetanik kilē, “Keepee tōkōl nkōō Koonēētiin sikēēmēērēē nkōō inyeentee.”
17 Paani kā-it :Yēēsu Peetannya, kuteer kilē kiiting'ēy :Lasaaro pērēētuus ang'wan kung'eetee /kēēsiintō. 18 Kiilēēkitēē keey :Peetannya ākōō Chēērusālēēm nyoo kiimuukēy ku-it kiilomiiteen sōmōk. 19 Kiikiipka nyuun :piich chaa chaang' kupa kuukaaykaay Maaryaa ākōō Marta akipō meeraa wēēriing'waang'. 20 Paani kateer :Marta kilē kiimii :Yēēsu kuchōōnēy, kutorooyta. Kung'ētuunō :Maaryaa kaaw. 21 Kumwoochi :Marta Yēēsu kilē, “Kiptaayaan, ntā kēēmii :inyēēn yēēnyi, ntā kāmāmēērēy :wēēriinyoon. 22 Aku ānkēt :aneen mpō paannyēēnyi kilē muukēy :Iriin ku-iruun kir aka tōkōl nyoo kēēsoom.” 23 Kumwoochi :Yēēsu Marta kilē, “Ng'ēētēē :wēēriing'woong' meerat.” 24 Kuwālchi :Marta kilē, “Ānkēt :aneen soonyeen kilē ng'ēētēē meerat pērēētuuni pō lēt.” 25 Kumwoochi :Yēēsu kilē, “Aneen nyi āng'ēētēē piich meerat ākookōōnuuy sopoon. Chiich aka tōkōl nyoo rānoon, kunyōōruuy sopoon mpō ntā kaakuma. 26 Ku choo sopoot akuurānoon kumāmēērsōōt pēsyēēt. Irānēy ng'aleechu?” 27 Kuwālchi :Marta kilē, “Lēē nyoonēē Kiptaayaan. Ārānaa kilē inyēēn *Meesaaya Wēēroo Iriin nyoo kii chōōnēy ng'wēny.”
28 Paani keewaang' :Marta kumwoorēy ng'aleechoochēē, kuwaraka kaaw akukuur chēētang'waang' kuwō kamas akumwoochi kilē, “Mii :koonēētiin yēēnyi akimii kutēēpiin.” 29 Kii nēē teer :Maaryaa ng'aleechoochēē, kung'eet kilē weel akuwō kuutorooyta Yēēsu. 30 Kiitoomō ku-it :Yēēsu kēēstoonichoochēē, kiitākumii yi kiinyōōrchi :Marta. 31 Paani keero :pichu kiimii kusoorsoorēy Maaryaa nkōō kō wōloo kiiwēētō :Maaryaa saang', kung'ēētyō tōkōl akutuup lēt. Kiipkootēy :pichoochēē kilē ālēē kiimārēy :Maaryaa kuwō kuriira wōli /kiikutupchi wēēriing'waang'. 32 Paani ka-it :Maaryaa yi kiimii :Yēēsu kuwiirchi keey kēēlyēēchiich akumwoochi kilē, “Kiptaayaan, ntā kēēmii inyēēn yēēnyi ntā kāmāmēērēy :wēēriinyoon.” 33 Paani keerō :Yēēsu kuriirēy :Maaryaa nkōō pichoochēē kiituupēy lēt, kung'woonchi ākōy kuu-iim keey. 34 Kuteep :Yēēsu kilē, “Kootupchi ānō?” /Kēēwālchi kilē, “Chōōnō roo Kiptaayaan!” 35 Kuriir :Yēēsu. 36 Kumwa :pichoochēē kilē, “Aroo kee wōloo kiichāmtooy :chiichi Lasaaro.” 37 Kumwa :pichoochēē walak kilē, “Kiisoop :chiichi kipkoroot, kilē nee māriip Lasaaro tamama?”
38 Kuureer kuu-iim keey :Yēēsu. Kuwō ākōy kēpēnēē wōli /kiikutupchi Lasaaro. Kiimii kor nyoo /kiikukara kurkaa kēpēnoonoonēē. 39 Kumwoochi :Yēēsu piich kilē, “Amiltee kortō.” Kuwālchi :Marta kilē, “Kiptaayaan, ng'uutooy āmu kiiku-it pērēētuus ang'wan kung'eetee kima chiichi.” 40 Kuwālchi :Yēēsu Marta kilē, “Kāmoomwooruun kilē nēē ranaan iirōōtēy kaamuuka nyēpō Iriin?” 41 Kumilta :pichoochēē kortō. Kuuro :Yēēsu parak akilē, “Paapa, āmwooruun kōōnkēy āmu kēētēērwoon ng'aleechuuch. 42 Ānkēt kilē itēērwoon pērēētuu aka tōkōl. Āmwoorēy kilēē nyoonēē sikuteer :pichu kumii tōkōl sikuuran kilē inyēēn nyi kiiyookwoon.” 43 Kii nēē waang' :Yēēsu kumwa kilēē nyoonēē, kukuursyō nkōō kuut nyoo ōōw kilē, “Lasaaro, chōōnō saang'!” 44 Kuchō :Lasaaro saang' nyoo kiikaakima. Kiirātootēēn :ēēruunēchiich nkōō kēēlyēēchiich nkōō sirōōy choo /kikikurataarata inyeentee /ākēētuptō. Kiirataat mpō koonyiichiich. Kumwoochi :Yēēsu pichoochēē kilē, “Atyaaka chiichi akaakany kuwēēchi keey.”
/Kēēchēpēy /keekeet Yēēsu
45 Kiiran Yēēsu :piich chaa chaang' choo kiikiipka kuuro Maaryaa āmu kiiro kiyoo kii-ir :Yēēsu. 46 Kipa nyuun :walak akupa kumwoochi *Parisaayiik kiyoo ki-ira. 47 Kutuuyō *Parisaay ākōō *tisiik choo ēēchēēn akukuurtō kōōkwō nyoo ōōw nyēpō Yāwuutik akimwa kilē, “Kimiichaan kēē-irēy nee? Nku mii :chiichi kii-irēy ng'al chaa chaang' chēpō kwōng'uut! 48 Nēē kumēti :chiichi kitas taay kilēē nyēēnyi, kuurānēy :chiich aka tōkōl inyeentee. Muukēy :kāāntōōy chēpō Rooma kupka aku-āp kōōrēēnyoon ākōō piichooch tōkōl.”
49 Kiimii yoonēē :chiich aka nyoo /kiikikuurēē *Kayaapa nyoo kii *Tisiintēē nyi Ōōw kēnyiinoonēē. Kimwoochi :chiichoonēē pichoochēē kilē, “Moonkēt :akwaan kir mpō ākoong'o? 50 Moorōōtēy :akwaan kilē kaykay kima :chiich ākoong'o akipō piich kusiir kurook :kōōrēē tōkōl?” 51 Kimwoorēy *:Kayaapa kilēē nyoonēē ku kii mā kaapkaateenyiin. Inyeentee nyi kii *Tisiintēē nyi Ōōw nkōō kēnyiinoonēē akiimii kung'ōōrēy kilē mēērēy :Yēēsu sikusop :kōōrēē. 52 Kiimāmēērēy :Yēēsu akipō piich chēpō *Israayeel kipaat. Kiimēērēy si nēē ng'at /keerum piich tōkōl chēpō Iriin choo kiisarat kilēku kir ākoong'o. 53 Kung'eetee pērēētuunoonēē, kitoowu :kāāntōōy chēpō Yāwuutik kuchēp wōloo /kuukēētitooy Yēēsu. 54 Ku maatakumanaata nyuun :Yēēsu /kēērootootēy nkōō kōōroonoonēē pō Chuuteeya. Kiiwō ārii aka nyoo /kiikikuurēē Epurayiim yoo kiilēēkitēē suur kwēēn. Kitēpō :Yēēsu wōloonēē ākōō kiineetanichiich.
55 Kiikiikulēēkitiit pērēētuu nyoo kyoomēē :Yāwuutik *Pasaka. Kupa nyuun :piich chaa chaang' Chēērusālēēm pākuutiliil keey, kutoomō ku-itu :pērēētuusyēchoochēē. 56 Kiimii :pichoochēē kuwāsēy Yēēsu. Kii paani kēērumchi keey *Kōpō Iriin, kuteep keey kilē, “Āpkootēy kilē nee? Mā chōōnēy man :chiichi tuumi?” 57 Kiikiikumwaarta *tisiik choo ēēchēēn ākōō *Parisaay kilē nēē nkēt :chiich aka tokol wōloo mii :Yēēsu, kumwaarta /sikeenam.