B suol Yiesu
18
1 Yiesu n maad nnyan g gbenn,
k u nyiɛ l buol k wano yen u *ŋuantieb puod Sedrɔn bɔnkɔdg.
L sua g gɔglug nne be l buol.
K b gad g kua l n ninŋ.
2 Suuda,
yua nba bo bu kuad Yiesu nyan bo ban l gɔglug buol,
g dugn Yiesu bo tund g saa l buol yen u ŋuantieb i.
3 Lann i k wano Suuda baal g kua l gɔglug n ninŋ g yeg yen *Rom sijenm yen *jaanddeciɛɔnŋ n sijenm nba g *salg-yidkab ciɛnm yen *Farisiɛn-nba bo sun’m,
k b diɛ naamaani yen fida yen jakɔntiɛd.
4 Yiesu bo tuod g ban yal nba bu baal’o kul,
lann i k u fiil g tuog’b g bual’b :
" I kpaan ŋmaa i ? "
5 K b ŋmiɛn’o :
" T kpaan Nasarɛt Yiesu i.
" G Yiesu maad :
" Min n nyan.
" L sua g Suuda,
yua bo bu kuad Yiesu nyan be b siign.
6 Yiesu n maad yaa youg k " min n nyan ",
k b lebd puotuntuna g baa baa.
7 G Yiesu biɛ guan g bual’b :
" I kpaan ŋmaa i ?
" K b yed g Nasarɛt Yiesu.
8 G Yiesu maad’b :
" N g maad’i mii min n nyan ii ?
L gii tie k min i k i kpaan,
yin ŋaa g lieb ne ń gii saa. "
9 Nnyan i k wano Yiesu n bo maad yal nba ji tien yen mɔni.
U kon bo maad :
" N Baa,
ŋan daan guun’n yab nba,
n g ŋaa g baa yend biɛl. "
10 L sua g Simɔn Piɛr ŋuu jug.
K u nɔd l jug g cua g jiɛl *salg-yidkab kul ciɛn tuonsunn nuujendu tubl.
B bo yi l tuonsunn Malkus i.
11 G Yiesu maad Piɛr :
" Guan g ŋuun a jug u tuaɔg n ninŋ.
A mali k n kan nyu n Baa n tie’n fala nyunŋmanŋ nba k n nyu yaa aa ? "
12 L youg g *Rom sijenm yen b canbaa,
yen *Suif-nba mɔ yaa sijenm suol Yiesu g lol’o.
13 B bo cind g gad yen’o Ann ŋaag i.
Ann bo tie Kaayif diɛnm i.
Kaayif n bo tie salg-yidkab kul ciɛn l binn.
14 Wano n bo maad Suif-nba yudanm g niyend gii gaal b buolu po g kpe lann n su.
Piɛr nai k u g ban Yiesu
15 Simɔn Piɛr yen Yiesu *ŋuantelua nne bo ŋua Yiesu.
*Salg-yidkab kul ciɛn bo ban l ŋuantua.
L po n te k u bo ŋuan Yiesu g baal g kua salg-yidkab kul ciɛn lijɔug n ninŋ.
16 G Piɛr nuan sed cincann,
dimɔb buol.
G Yiesu ŋuantelua nba g salg-yidkab kul ciɛn bo ban’o nyan nyiɛ g pag yen puo nba bo guu dimɔb nyan g kuan Piɛr.
17 G puo nba bo guu dimɔb nyan bual Piɛr :
" A tien tu g tie jua ne ŋuantua kaa aa ?
" G Piɛr ŋmiɛn’o g yed :
" Kai,
min g tie u ŋuantua. "
18 Wad n bo be nyan,
g tuonsunna yen sijenm son muu g yie.
G Piɛr mɔ sie b buol g yie muu.
19 G salg-yidkab kul ciɛn bual Yiesu buali u ŋuantieb yen u tundl po.
20 G Yiesu ŋmiɛn’o :
" Min tu l maad niib nunŋ n i,
g yua kul gbiɛ.
N tu tund n tundl mɔ *tintaann died n yen *jaanddeciɛɔnŋ n i,
naan buol g *Suif-nba kul taand lieb.
N g ban g maad siɛl wuol n ninŋ.
21 Laabaal k a bual’n l buali i ?
Bual yab nba daan cenŋ n maam,
banm ban min daan maad yal nba. "
22 Yiesu n maad nnyan yaa youg,
l sua g sije nne sie u buol,
k l sije peb’o tanpaɔg g nyaan bual’o :
" Ŋan baa ŋmiɛnd Yendu salg-yidkab kul ciɛn nand n nyan ii ? "
23 G Yiesu ŋmiɛn’o :
" L gii tie k n maad g kpiɛd,
ŋan ŋɔn min kpiɛd naan buol nba.
Min maad yal nba gii tie mɔni,
bɛ po i k a yen ji pua’n i ? "
24 K Ann yed k ban gad yen’o salg-yidkab kul ciɛn Kaayif buol.
U bo l luol i.
Piɛr biɛ nai k u g ban Yiesu
25 Simɔn Piɛr daa bo l be l buol g yie muu i,
k b tan baal g bual’o :
" A g tie jua ne *ŋuantua kaa aa ?
" G Piɛr nai g maad :
" Kai,
min g tie u ŋuantua ".
26 L sua g *salg-yidkab kul ciɛn tuonsunna n ninŋ jua nne be l buol,
u bo tie Piɛr n bo cua g jiɛl yua nba tubl nyan naataanu i.
K l jua bual Piɛr :
" N bo g la’a gɔglug n ninŋ k a be yen’o oo ? "
27 G Piɛr biɛ nai.
L youg u g kuutounŋ buud.
B gad yen Yiesu Pilat buol
28 K l fann siŋapanpan g *Suif-nba yudanm nyiɛ yen Yiesu Kaayif ŋaag g gad yen’o *Rom gobna ŋaag.
Ama yab nba bo gad yen’o bo g tuo g kua,
g dugn b bo g bua k b mɔg siɛl yaa jɔgnd Yendu nunŋ n ninŋ,
nnyan i k b bo bu fid g di *Fielu jaanm.
29 L po n te g *Pilat bo nyiɛ g tuog’b cincann g bual’b :
" Jua ne biil bɛ i k i baal yen’o i ? "
30 K b guan g ŋmiɛn’o :
" U bo gii g tie nibiiug,
t bo kan suol’o g baal g te’a. "
31 Lann i g Pilat maad’b :
" Yinm mɔno n tug’o g daan bu’ug,
nyan i *yiko n bual nand nyan.
" K b guan g ŋmiɛn’o :
" T g mɔg nuu yen tin kpi nil ".
32 L bona bo tien nnyan,
g Yiesu n bo maad maam nba g ŋɔn kubuolu nba k u bu kpe nyan,
ń te mɔni i.
33 G Pilat guan g kua ŋaag n ninŋ g te g sijenm kua yen Yiesu k u bual’o :
" A tie *Suif-nba bad yaa aa ? "
34 G Yiesu mɔ guan g bual’o :
" Fin mɔno pal n maam i k a maad bii,
siɛb n maad n po k a gbad i ? "
35 G Pilat ŋmiɛn’o :
" N mɔ tie Suif yaa aa ?
A doug n yab,
mandg *salg-yidkab ciɛnm n tug’a g baal g tie’n.
A biil bɛ i ? "
36 G Yiesu ŋmiɛn’o :
" N *bal g tie ŋanduna ne yal kaa.
L bo gii tie ŋanduna ne yal,
n naasenm bo bu kɔn n po,
b bo kan ŋaa ban suol’n g te Suif-nba yudanm.
N bal yen g tie ŋanduna ne yal. "
37 G Pilat biɛ guan g bual’o :
" Lann a tie bad yaa aa ?
" G Yiesu ŋmiɛn’o :
" Fin n maad k n tie bad.
B mal’n,
k n baal ŋanduna n ninŋ ne,
k n ŋɔn niib mamɔni i.
Yua nba tie mamɔni nil kul cenŋ n maam. "
38 G Pilat guan g bual’o :
" Mamɔni tie bɛ i ?
" Lann i g biɛ guan g nyiɛ cincann g la Suif-nba yudanm g maad’b :
" Min g la jua ne n biil yal nba.
39 Ama n ban g siɛl be g ji tie nyan bogdl nyan i po.
Fielu jaanm kul n tu luod dansalyenŋ g ŋaa’ɔg.
I bua k n luod i po Suif-nba bad ii ? "
40 Lann i k b ji ta g maad :
" T g bua wano kaa,
t bua Barabas i.
" Wano Barabas bo tie bibiɛdg i.