¹ Kaliˈ pektaluˈ si Isus tu nga melaun getaw mukaˈ tu nga sakupen, ² “Mendadi ki nga mekpetuˈun di Misulat Palinta nu Megbebayaˈ mukaˈ ki nga Pariseo, ilan dawi tinduˈ megulug tu Palinta nu Megbebayaˈ pisulaten dini Moises. ³ Naa kagina maˈantu, subay petuuden niu su nga mekpetuˈun di Palinta kini mukaˈ su nga Pariseo, subay dunutan niu su kelaun pektituluˈen nilan diniu. Dagid kig betad nilan, ndiˈ niu penunggilingay, puˈ laini pektituluˈen nilan, lain dademai pegbetaden nilan. ⁴ Pipisan nilan gembegat tituluˈan tu nga samataw nilan, asa ilan, ndiˈ nilan tanan etateni salabuuk tu nga tenduˈ nilan meguit tu guiten nug duma nilan kia. ⁵ Su kelaun baalen nilan, penggulaulaan nilan adun mekpaitaˈitaˈ laak di samataw nilan. Puˈ su igbed nilan kia di gangas nilan mukaˈ baingken nilan sinulatan Taluˈ nu Megbebayaˈ, pilekpang nilan gupia! Dakus su nga gungmay nu suub nilan, su tuˈus tu kektamuy nilan tu Megbebayaˈ, pilebian nilan petaasay! ⁶ Mukaˈ saˈ ditu ilan keglekebibu, liagan nilan su pegingkudan nu pegbesaan getaw. Mesama dia simbaan, mauyaˈan nilan su tampusan metaas gingkudan. ⁷ Saˈ ditu pelum tebuˈan, mauyaˈan nilan pegbesaan ilan nu nga getaw, dakus gelalen ilan, ‘Mekpetuˈun.’ ⁸ Yamu pasiˈ, kanaˈ amu gempia gelalen ‘Mekpetuˈun,’ puˈ miksama laak amu, lumbus amu samasakup, mukaˈ sala tawan da laaki Mekpetuˈun diniu. ⁹ Maˈantu dadema, ndaˈiduni sama kilawan niu dinig dibabaw lumbang gempia niu gelalen ‘Amaˈ,’ puˈ ndaˈig lain gamaˈ niu, subay su laak Gamaˈ niu ditu gekbus langit. ¹⁰ Mukaˈ pagid kanaˈ damu dema gempia gelalen ‘Kaunutan,’ puˈ sala tawan laaki kaunutan niu, ki Tinduˈ nu Megbebayaˈ Meglekaunutan.” ¹¹ Diksuˈ ni Isus su taluˈen, “Sinangkaliˈ pa tanan, ki tampusan metaasi tindegen diniu, subay iin nai mbaal sesuguˈen niu. ¹² Adin su getaw petaasenen siai tindegen, iini pebebaˈen. Adin dema su getaw mekpebabaˈ dig lawasen, iini petaasen.”

¹³ Maaˈ laung pa ni Isus, “Mekelelaatlelaat amu dema tuˈu, yamu nu nga mekpetuˈun di Misulat Palinta nu Megbebayaˈ mukaˈ yamu nu nga Pariseo! Paa, tautau amu mekesuun! Puˈ siniraan niu sug bisuangan nu Keglekaunutan nu Megbebayaˈ mukaˈ inapaˈ niu su nga getaw sumakup dun sia, dagid yamu, ndaˈ damu dema sakup dun! [ ¹⁴ Mekelelaatlelaat amu daan, yamu nu nga mekpetuˈun di Palinta mukaˈ yamu nu nga Pariseo! Paa, tautau amu daan mekesuun! Puˈ peglimbungan niui ngag balulibun, mengagaw amu tu nga pimetang nilan, asa petaasen niu su kenenabi niu, pekpaitaˈitaˈ laak niu. Naa maˈnia, midugangan dema tuˈui kebegat nu ginukuman diniu.]”

¹⁵ Laung pagid ni Isus, “Mekelelaatlelaat amu daan, yamu nu nga mekpetuˈun di Palinta mukaˈ yamu nu nga Pariseo! Paa, tautau amu daan mekesuun! Puˈ mileep niu su tibuuk lumbang, adun puluˈ duuni sala tawan mesakup niu. Dayun saˈ duuni sumakup na diniu, pebantang niu iin belengen tug linaw gapuy, labi pa di kebantang dun dig lawas niu!

¹⁶ “Mekelelaatlelaat amu daan, yamu nu nga megagak di getaw, asa maaˈ amu nug buta! Puˈ iini pektituluˈen niu dinilan, ‘Saˈ duun laungi sumapa, iini sembayanen su Pengedapan tu Megbebayaˈ, naa ndiˈen kambat tumanen ki sapanen kia. Dagid saˈ iin sungkini sembayanen sug bulawan bitang diag dialem nu Pengedapan, naa subay penuudenen laung ki sapanen kia.’ ¹⁷ Paa, buta amu mukaˈ benguˈbenguˈen amu pa pagid! Puˈ adin bai metaas, sug bulawan saˈ su Pengedapan tu Megbebayaˈ? Kanaˈ nu Pengedapan? Puˈ sug bulawan, iini pinaas dun, puˈ dia mibetang dialem Pengedapan tu Megbebayaˈ. ¹⁸ Mukaˈ duun pai pektituluˈen niu, ‘Saˈ duun laungi sumapa, iini sembayanen sug betang inilak dia gentudan gilak tu Megbebayaˈ, naa subay tumanenen ki sapanen kia. Dagid saˈ iin sungkini sembayanen su gentudan gilak, teluˈen niu puˈ ndiˈen kambat tumanen su sapanen kia.’ ¹⁹ Paa, saˈ maˈantu, lepeng buta amu tantu! Adin ba su metaas, sug betang atawaka su gentudan gilak tu Megbebayaˈ? Kanaˈ baini metaas su gentudan gilak? Puˈ iini pinaas dun sug betang, puˈ dia ilakay gentudan gilak tu Megbebayaˈ. ²⁰ Kaas ma, saˈ sumapai getaw, sembayanen su gentudan gilak tu Megbebayaˈ, maˈananen, mipedumanen dadema sembayay su kelaun betang inilak tu Megbebayaˈ. ²¹ Mesama dadema saˈ duuni getaw sumapa, sembayanen su Pengedapan. Maˈananen, misambayen su Pengedapan, mipeduma dun su Megbebayaˈ, su luminusad pegbenwa dun. ²² Maˈantu da pagid, saˈ duuni sumapa, sembayanen su gekbus langit, maˈananen, misembayanen su gingkudan nu Megbebayaˈ, kampuˈ nu pegingkud dun.”

²³ Maaˈ laung pa ni Isus, “Mekelelaatlelaat amu daan, yamu nu nga mekpetuˈun di Misulat Palinta nu Megbebayaˈ mukaˈ yamu nu nga Pariseo! Paa, tautau mekesuun amu daan! Puˈ pia su gininisan pegdaut, begay niu tu Megbebayaˈ su kesepuluˈ ilasen. Dagid ki metaas gupia pinalinta, saˈitada ki melegdeng betad, ki keglinelaatay mukaˈ ki keseligan, baa, kig launanen kia, ndaˈ dig delendeman niu. Asa kiin siaig bantang pegbetaden niu, sampay su nga duma pinalinta pa pagid. ²⁴ Baa, yamu kiin, megagak amu daan tu getaw, asa buta amu! Puˈ saˈ duuni inumen niu melebuˈan nu salabuuk maikaˈ langaw, seluten niu, dagid saˈ melebuˈan kamelyu, inumen niu dayun!^a

²⁵ “Mekelelaatlelaat amu daan, yamu nu nga mekpetuˈun di Misulat Palinta nu Megbebayaˈ mukaˈ yamu nu nga Pariseo! Paa, tautau mekesuun amu daan! Puˈ ugasan niu sug dibabaw nu pinggan niu mukaˈ tasa niu, laak dagid sug dialemen, mipenuˈ nu pingagaw niu puun dig limbung niu mukaˈ gayak niu. ²⁶ Paa, yaˈa pa dig buta Pariseo! Una mu pa ugasay ki seled nu tasa, dayun melimpiu dadema sug dibabawen!”^b

²⁷ Laung ni Isus, “Mekelelaatlelaat amu daan, yamu nu nga mekpetuˈun di Misulat Palinta nu Megbebayaˈ mukaˈ yamu nu nga Pariseo! Paa, tautau amu daan mekesuun! Puˈ pitanggiˈu amu di ngag lebeng piputiˈ gupia, kaas sug dibabawen, melengas gupia pegbentayan. Laak sug dialemen, mipenuˈ tulan mukaˈ nga mimegeduˈ. ²⁸ Maˈantu damu dema. Saˈ sug dibabaw lawas niu, mekesuun amu getaw di pegitaˈen nu kelaun getaw. Dagid kig dialem nug delendeman niu, mipenuˈ pembaalbaal mukaˈ ngag limbung.”

²⁹ Pidayun gusay ni Isus su taluˈen, “Mekelelaatlelaat amu daan, yamu nu nga mekpetuˈun di Misulat Palinta nu Megbebayaˈ mukaˈ yamu nu nga Pariseo! Paa, tautau amu daan mekesuun! Puˈ migbaal amu melengas lebeng tu nga pimuunan nu Megbebayaˈ dengantu, mukaˈ peksibaˈan dadema niui nga pantiun nu mekesuun getaw. ³⁰ Mukaˈ teluˈen niu, ‘Yami kini, saˈ pinenggiˈ misagut nami sia su gendawan kitu nu nga ginepuˈay nami, naa yami, ndiˈ ami sia mpeduma di kekpatay nilan tu nga pimuunan nu Megbebayaˈ kia.’ ³¹ Dagid saˈ tinaluˈ niui maˈnia, miangken niu puˈ sapuˈ amu nu nga mimunuˈ tu nga pimuunan nu Megbebayaˈ kia! ³² Kaas saˈ maˈnia, naa sigi na, tubus niu dayun ki pinggulaula nu nga ginepuˈay niu kia! ³³ Paa, yamu pa di nga mamak, sapuˈ damu dema mamak! Kendutaˈ mai keliaw niu dun ki ginukuman, belengen amu tug linaw gapuy? ³⁴ Kaas taman taluˈu diniu, suguˈen ku diniui nga pemuunan ku dakus nga telisebuten getaw mukaˈ nga mekpetuˈun. Dagid sug duma, petain niu. Sug duma pelum, lensangen niu di kurus. Sug duma pa pagid, pembedasen niu diag dialem nga simbaan niu, dayun pengeteden pa niu tu ngag lain lunsud. ³⁵ Kaas iini puunanen, yamu kiin, melabuˈ tuˈu diniu su ginukuman tu kemunuˈ ditu kelaun getaw pinatay di ndaˈi salaˈ nilan, genat dini Abel su ndaˈi salaˈen sampay dini Zacarias, bataˈ ni Baraquias, su pinatay niu kia ditu Pengedapan tu Megbebayaˈ, dia gelet nu Meˈelig Sugud mukaˈ su gentudan gilak.” ³⁶ Diksuˈ ni Isus su taluˈen, “Taman taluˈu diniu, melabuˈ tuˈu diniu nga getaw nemun su ginukuman tu kelaun kemunuˈ kitu!”

³⁷ Laung padun ni Isus, “Uy, yamu nga getaw Jerusalem, yamu nga mekpatay di nga pimuunan nu Megbebayaˈ, betuun pa pagid niu su nga sinuguˈ diniu nu Megbebayaˈ! Tatapu amu sia ekupay, maaˈ nu nga pesuy pegleeman nu ginaˈen! Dagid mpauk amu dun! ³⁸ Kaas belengan tuˈu nu Megbebayaˈ kig lunsud niu, dayun pelengan gapuy. ³⁹ Taman taluˈu diniu, genat nandaw, ndiˈ na niau puliˈ maitaˈ, sampay mateng su gendaw metaluˈ niu, ‘Aa naa, kiin na, minateng na ki pigwekilan nu Kaunutan Megbebayaˈ. Melengas pepianan iin nu Megbebayaˈ.’”