¹ Naa miksambingay pa gusay si Isus tu nga getaw, laungen, ² “Mendadi saˈ meglekaunutan na tuˈu su Megbebayaˈ, maˈniniˈig bianen. Petanggiˈu di gadiˈ miglekebibu, puˈ beliˈiin sug bataˈen. ³ Mendadi benaˈ sungu na megdeksuˈ sug belaˈi, suminuguˈ ki gadiˈ kini di nga sesuguˈenen meksabi tu nga getaw pisebutanen, adun sumaup nailan ditug belaˈi. Laak dagid ki nga ginggaten sumaup kini, mpauk ilan masiˈ sumaup. ⁴ Naa saˈ maˈantu, suminuguˈ su gadiˈ di ngag duma sesuguˈenen, pimuunen tu nga ginggaten kia, ‘Minuyaˈ nai gilak. Tinitiˈu na su ngag bakau, sampay su pilembuˈu nati, mukaˈ minuyaˈ naig launanen. Kaas saup namu dinig belaˈi kini!’ ⁵ Laak dagid su nga ginggat sia sumaup kia, maˈniin ndaˈ nilan medengeg, mipanaw laak ilan sungkin. Sala tawan, minangay tug binaalanen. Sala tawan pelum, minangay tu tindanen. ⁶ Sug duma pelum, inukpaˈan nilani nga sesuguˈen kia nu gadiˈ, dayun piksudawan nilan patiˈ. Deksuˈanen, binunuˈ nilan. ⁷ Mendadi ki gadiˈ kini, mitutung dayun gangiten. Sinuguˈen meditu su nga sundalunen, adun bunuˈen nilan su nga minunuˈ tu sesuguˈenen kia mukaˈ sensulan nilan sug lunsud nilan. ⁸ Naa benaˈ mitubus, suminabi pa su gadiˈ di nga sesuguˈenen, kaliˈ pektaluˈ dinilan, ‘Naa kini, minuyaˈ naig belaˈi. Laak dagid su nga getaw inggatu sia, kanaˈ ilan mbantang sumaup dun. ⁹ Kaas peditu namu karsada mbianan nu melaun getaw, dayun adin su taman getaw maitaˈ niu, enggat niu ilan gelaˈ.’ ¹⁰ Naa saˈ maˈantu, miditu gembagel karsada su nga sesuguˈen kia nu gadiˈ, pinungun nilan dayun ki nga getaw, su mekesuun saˈ su medupang, adin su taman mitaangan nilan. Dekag pa gembibu ilan diag balay pemeliˈian.

¹¹ “Laak dagid su gadiˈ, benaˈ minangay madap tu nga suminaup tug belaˈi, duuni minitaˈen sala tawan, ndaˈ masiˈ pekseluk pekayan dig belaˈi. ¹² Sinaakan nu gadiˈ ki getaw kini, ‘Baa lai, mauma ndiˈa mpiid suled dini, ndaˈ mu selukay su penepeten nu sumaup tug belaˈi?’ Ndaˈ kesembag ki getaw kini. ¹³ Liningay dayun nu gadiˈi nga sesuguˈenen kia, kaliˈ pektaluˈ dinilan, ‘Naa, balud niui getaw kia, kampuˈ nu geksuden, dayun niu piglak tug liu, ditu medelem. Ditu dayun mengaduy, lamugen mengkiget di ngisinen.’”

¹⁴ Diksuˈ ni Isus su taluˈen, laungen, “Kaas melaun siai getaw enggaten sumakup, laak dagid meliangi tinduˈ nu Megbebayaˈ sakupen.”

¹⁵ Naa ki nga Pariseo, minawaˈ ilan dia, dayun mikpungun ilan, minengaw ilan bian nilan mengiman dini Isus di teluˈenen. ¹⁶ Mendadi duuni nga sakup nilan mukaˈ nga sakup ni Herodes sinuguˈ nilan mangay ditu ni Isus. Benaˈ minadap dini Isus su nga sinuguˈ kia, tautau ilan suminaak diniin, “Naa Sir, misuunan nami puˈ pektuˈun mu su metuud. Ndaiˈ pegisuun mu tu tindeg nu getaw, kaas ndiˈa mpesuay di metuud, pektuˈun mu gusay su tantu mauyaˈan nu Megbebayaˈ pegbetaden nu getaw. ¹⁷ Naa saˈ maˈantu, iini taluˈ mu dinami, ki megbuis ditu tampusan gadiˈ si Cesar, alandunig delendeman mu dun? Biwang ba ditu Misulat Palinta nu Megbebayaˈ, saˈ ndaˈ?”

¹⁸ Laak dagid misuunan ni Isus puˈ iini puun nu kesaak nilan diniin kia, su melaat delendeman nilan. Kaas laungen dinilan, “Baa, yamu kiin nu nga tautau mekesuun! Mauma pengimanan ma niau? ¹⁹ Paitaˈ niu deliˈ dinaan selapiˈ bayad dig buis kia!”

Tinulunan nilan dayun si Isus selapiˈ. ²⁰ Sinaak dayun ni Isus dinilan, “Naa, taˈ taway dun baig lingaw kini? Taˈ ngalan dun bai misulat dadema dini kini?”

²¹ Laung nilan, “Dani Cesar.”

Kaliˈ pektaluˈ si Isus, “Naa saˈ maˈantu, kig dani Cesar, bayad da niu diniin. Dagid sug danu Megbebayaˈ, begay da niu dema ditu Megbebayaˈ.”

²² Naa benaˈ midengeg nu nga sinuguˈ nu Pariseo kia su simbag ni Isus, misebuˈan ilan dun. Bilengan nilan si Isus, migawaˈ ilan dia.

²³ Naa benaˈ su gendaw kia, duuni nga Saduseo mituaˈ ditu ni Isus. Naa ki nga Saduseo kini, ilani sala pikumpungan ndiˈ ilan metuudan dun puˈ su nga minatay, metubuˈ puliˈ. ²⁴ Mendadi, kaliˈ pembaalbaal sumaak dini Isus ki nga Saduseo, “Naa Sir, duuni palinta pisulat nu Megbebayaˈ dini Moises, ‘Saˈ daw matayig laki, laak ndaˈidunig bataˈen, naa subay sukliin nu pated nu minatay. Iini menginsawa tug balulibun, adun duunig bataˈ nilan, lepeng bataˈ nu minatay kitu.’ ²⁵ Mendadi, duuni pitu tawan dinami mekpated. Minginsawa su gulangbataˈ dayun minatay, ndaˈidun paig bataˈen, kaas sug balu, sinukli penginsuaay nu medapit ditu minatay. ²⁶ Dayun su keduaˈ pateden pelum, maˈantu dadema, dakus su ketelu pateden. Iin nai migbatag ia, gikteb nu pitu tawan kia. ²⁷ Tigaˈwan sug libun, minatay dadema. ²⁸ Naa paladpalad saˈ duun siai metubuˈ daw puliˈ genat matay, naa kig libun kia, adin ma dayuni sawanen ditu pitu tawan kia, kagina migelaˈ ma mayan mpenginsawa nu mekpated kia?”

²⁹ Laak dagid kaliˈ sembag si Isus, “Baa, gembagel gupiaig lapang niu! Puˈ ndaˈ niu mesabut su Misulat Taluˈ nu Megbebayaˈ, sampay ndaˈ niu dadema mesabut su gikteb nu ginuung nu Megbebayaˈ. ³⁰ Puˈ saˈ metubuˈ na puliˈ su nga minatay, ndiˈ nailan meksenlangan, segaga mesama ilan ditu nga sesuguˈen nu Megbebayaˈ getaw langit. ³¹ Mukaˈ padun, petubuˈen daan puliˈ tuˈu su nga minatay, puˈ ndaˈ ba niu mbasa ki tinaluˈ nu Megbebayaˈ diniu, maˈniniˈ? Maaˈ laung nu Megbebayaˈ, ³² ‘Naani Megbebayaˈ pektemuyen ni Abraham, pektemuyen ni Isaac, mukaˈ ni Jacob.’” Kaliˈ gusay pektaluˈ si Isus, “Naa misuunan ta, iini mektamuy tu Megbebayaˈ su getaw tetubuˈ, kanaˈ nu nga minatay.”^a

³³ Naa benaˈ midengeg nu nga melaun getaw ki pituˈun kia ni Isus, misebuˈan ilan dun gupia.

³⁴ Naa su nga Pariseo, benaˈ misuunan nilan puˈ midempek ni Isus su nga Saduseo, mikpungun ilan puliˈ. ³⁵ Mendadi, duuni sala tawan dinilan mekpetuˈun di Misulat Palinta mikpesempel dini Isus, puˈ adun pengimanenen sia su metaluˈen. ³⁶ Suminaak dini Isus su mekpetuˈun, “Naa Sir, taˈ palintaay duni tampusan metaas ditu Misulat Palinta nu Megbebayaˈ?”

³⁷ Kaliˈ sembag si Isus, “Kini. Saladuaˈ diniu, petail mu tantu su Kaunutan mu Megbebayaˈ, saˈitada pegwakil mu diniin su tibuuk ginaa mu mukaˈ su tibuuk gimuud mu, dakus su tibuuk delendeman mu.’ ³⁸ Kinii tampusan metaas palinta. ³⁹ Mukaˈ dumanen dadema ki keduaˈ metaas palinta kini. ‘Petail mu dadema sug duma mu. Su kepetail mu diniin, pelepeng mu di kepetail mu dig lawas mu.’” ⁴⁰ Kaliˈ pagid pektaluˈ si Isus, “Kig duaˈ buuk palinta kini, iini pikumpungan nu tibuuk Palinta nu Megbebayaˈ pisulaten dini Moises mukaˈ tu ngag duma pimuunanen dengantu.”

⁴¹ Naa benaˈ mikpungun ki nga Pariseo, sinaak ni Isus dinilan, ⁴² “Naa ki gasal nu Tinduˈ nu Megbebayaˈ Meglekaunutan, alandunig delendeman niu dun? Taˈ taway dun gupiai ginepuˈayen?”

Kaliˈ ilan sembag, “Sapuˈ ni David.”

⁴³ Simbag ni Isus, “Dagid ki Tinduˈ nu Megbebayaˈ Meglekaunutan, saˈ sapuˈ laak sia ni David, naa taˈ mai migelal dun si David Kaunutan? Mukaˈ su kegelalen dun maˈnia, pisulat si David nug Balakat nu Megbebayaˈ, laungen,

⁴⁶ Naa su sinaak ni Isus dinilan kia, ndaˈiduni mekesembag dun, pia sektaang taluˈ. Naa genat itu, ndaˈidun nai getaw mekakuˈ sumaak dini Isus.