¹ Naa selian ni Isus megukit, kanaˈ da dun santaˈ ngibu tawan nga getaw mikpungunpungun diniin, diadia maindeganenig dumanen. Mendadi, inuna ni Isus tituluˈay su nga sakupen, laungen, “Peglengilamay niu su petulin nu nga Pariseo di pan, saˈitada kig betad nilan tautau mekesuun. ² Puˈ ndaˈiduni tibunan nemun, ndiˈ mbuasan. Ndaˈiduni giglud nemun, ndiˈ dema mesuunan. ³ Kaas adin su tinaluˈ niu di meleglud, medengeg pa tu gedapan. Adin su kimed niu dig dialem sugud, mpegukit tu tebuˈan.”

⁴ Kaliˈ gusay pektaluˈ si Isus, “Taman taluˈu diniu nga sambatu, ndiˈ niu endekayi sama kilawan niu, puˈ daal da laaki megaganen petayay, sug lawas nu getaw. ⁵ Segaga pesuun ku diniu ki gempia niu endekan. Iin laaki gempia endekan niu, su Megbebayaˈ, kig duuni pegbayaˈen mekpatay di getaw, mukaˈ pa padun megbeleng dun ditug linaw gapuy. Iin dema tuˈui endekay niu, su Megbebayaˈ!”

⁶ Laung pa ni Isus, “Naa pegdelendem niu deliˈ su manukmanuk. Lima buuk leksayaw, ndiˈ ba mesaluy duaˈ laad siin? Laak pia maˈantu, ndaˈi salabuuk dun ndiˈ eklungan nu Megbebayaˈ. ⁷ Yamu pelum, pia kig buuk di gulu niu, misuunan da nu Megbebayaˈ saˈ santaˈ balu. Kaas ndiˈ amu mendek, puˈ gembagel gupiaig lagaˈ niu tu Megbebayaˈ, sabayaˈ nu nga manukmanuk!”

⁸ Kaliˈ pektaluˈ si Isus, “Kini pagidi taluˈu diniu, adin su getaw kanaˈ mpiid meglegintuud di gedapan nu nga getaw puˈ suminakup dinaan nug Bataˈ nu Kilawan, naa naan, engkenen ku dadema iin ditu gedapan nu nga sesuguˈen nu Megbebayaˈ getaw langit. ⁹ Adin demai memalaw di gedapan nu getaw puˈ kanaˈ sakupu iin, naa pemelaun ku dadema iin ditu gedapan nu nga getaw langit.

¹⁰ “Adin pagidi getaw meksudiˈ dinaan kig Bataˈ nu Kilawan, pedesunen da dun. Dagid adin su getaw peksudiˈanen sug Balakat nu Megbebayaˈ, ndiˈ na pedesunen.”

¹¹ Laung pa ni Isus, “Mendadi saˈ dengaten amu ditu nga simbaan nu getaw Judea, mesama tu gedapan nu nga gukum buˈ kaunutan, naa ndiˈ amu melibuleng saˈ taˈ alandun mai gempia niu sembag dun. ¹² Puˈ saˈ dengaten namu, iin na gupiai mektituluˈ diniu tu gempia sembag niu dun, sug Balakat nu Megbebayaˈ.”

¹³ Naa mendadi, duuni sala tawan dia nga melaun getaw, laungen dini Isus, “Naa Sir, saˈ mesuˈat, taluˈ mu tu gulangbataˈu, ilasanu dun su pusakaˈ nami.”

¹⁴ Kaliˈ sembag si Isus, “Baa lai, laung mu dun tinduˈu gukum niu mekilas pusakaˈ diniu?” ¹⁵ Kaliˈ dayun pektaluˈ si Isus tu nga getaw, “Petubud amu, peglengilamay niu ki mesaku amu, pia taˈ alanduni mesaku amu dun sia. Puˈ su tantu ketubuˈ nu getaw, ndaˈig labeten dun su pimetangen, maikaˈ saˈ melaun.”

¹⁶ Migbaal dayun si Isus penenggiˈan dun, laungen, “Duuni medatuˈ getaw, singkuˈan gupia. ¹⁷ Kaas dialem ginaanen, ‘Naa, kendutaˈen ku ma duni sengkuˈu kini? Sabaˈ kelaunen, ndaˈidun naig betangan ku dun.’ ¹⁸ Kaliˈ pegleketau, laungen, ‘Aa naa, pemaˈniniin ku. Tulagen ku su ngag bengelan ku, puˈ baalen ku puliˈ ki gembagel pa padun, diaan ku na penteguˈayi sengkuˈu sampay su nga pimetangu. ¹⁹ Dayun teluˈen ku dig delendeman ku, Aa naa, melaun na mitaguˈu, sukal da di santaˈ taun! Mesuˈat na melaliu, maan laak, meginum, mukaˈ meglekebibu!’ ²⁰ Laak dagid miktaluˈ diniin su Megbebayaˈ, ‘Benguˈbenguˈen ka getaw! Gebii kini, matengi gumul mu. Dayun ki kelaun ginandam mu kiin, taway dun mai malap dun?’”

²¹ Diksuˈ ni Isus su sambingayen, laungen, “Mendadi, maˈnia su getaw mektimud gaˈus kinilawan, laak di pegitaˈen nu Megbebayaˈ, gempusuk da.”

²² Naa pidayun gusay sumpatay ni Isus su taluˈen tu nga sakupen, “Kaas taluˈu diniu, ndiˈ niu libulengayi ketubuˈ niu, saˈ taˈ ma saani aanen niu. Dakus ndiˈ niu dadema libulengay sug lawas niu, saˈ taˈi kenapet niu. ²³ Puˈ su ketubuˈ nu getaw, gembageli pantagen sabayaˈ nu kaˈaanen. Sug lawas nu getaw, gembagel dademai pantagen, sabayaˈ nu kenapeten. ²⁴ Mukaˈ pegdelendem niu pagid su nga guak. Su guak, ndiˈ memula, ndiˈ dadema meglegani, ndaˈidun tananig bengelanen. Laak pia maˈantu, paanen da nu Megbebayaˈ su guak! Naa kanaˈ ba labi pamu paanen, ki metaas pa tananig lagaˈ niu, sabayaˈ nu nga manukmanuk? ²⁵ Keduaˈen, duun bai sala tawan diniu, megaganen petaasayi gumulen sendaw pebian di kelibulengen dun? ²⁶ Naa saˈ ndiˈ niu megagai maikaˈ kia, alandun bai malap niu saˈ melibuleng amu dig duma ketubuˈan niu? ²⁷ Mukaˈ pegdelendem niu pagid sug bulak nu sigbet. Ndiˈ mengimbaal su sigbet, ndiˈ dadema megabel. Laak taluˈu diniu, pia si Adiˈ Salomon, saˈ migimakay gupia, ndaˈi salabuuk bulak sigbet, kanaˈ melengas pa di kenapet ni Salomon kitu. ²⁸ Naa su sigbet, maitaˈ nandaw, lemaˈ mbaluy laak tagun. Laak pia maˈantu, begayan nu Megbebayaˈ pekayanen su sigbet, saˈitada sug bulaken. Saˈ maˈantu, kanaˈ bamu labi na begayan nu Megbebayaˈ penepeten niu? Kaas mauma dema maikaˈ da ki kesalig niu tu Megbebayaˈ?”

²⁹ Diksuˈ ni Isus su taluˈen, “Kaas ndiˈ mbagel dig delendeman niu ki kaˈaan niu buˈ kainum niu, mukaˈ ndiˈ amu melibuleng dun. ³⁰ (Puˈ su nga kanaˈ mekpetuud dinig dibabaw lumbang, gembagelig delendeman nilan dun.) Yamu pasiˈ, misuunan nu Gamaˈ niu su kelaun kulang di sukat niu. ³¹ Segaga iini pebagel niu dig delendeman niu, ki kesakup niu tu Keglekaunutan nu Megbebayaˈ. Saˈ maˈantu, su gininisan sukat, begay dadema nu Megbebayaˈ diniu.”

³² Kaliˈ pektaluˈ si Isus tu nga sakupen, “Naa yamu, pia maikaˈi pikumpungan niu, ndiˈ amu mendek. Puˈ pigdelendem na nu Gamaˈ niu, mpeduma amu tu Keglekaunutanen. ³³ Kaas su pimetang niu, peksaluy niu, mukaˈ begay niu tu pubri su galinen. Saˈ maˈniai penggulaulaan niu, gitunganen, mikalap amu pitaka ndiˈ na medanul, miktaguˈ amu gimu ditu gekbus langit, ki gimu ndiˈ mengkanan, ki ndiˈ dadema mesempelan nu megdaaw, sampay ndiˈ mesuˈat aanen guled. ³⁴ Puˈ adin mibetang su gimu niu, ditu dademaig delendeman niu.”

³⁵ Kaliˈ pektaluˈ si Isus, “Mendadi, pengandam amu, peginapet amu, ndiˈ niu gusay pelengayi suluˈ niu. ³⁶ Iini penunggilingay niu, ki nga sesuguˈen megelat tu gegalen nilan muliˈ genat tug belaˈi, adun mpukaˈan nilan ganam saˈ mateng na mukaˈ meksabi. ³⁷ Naa saˈ metaangan nu gegalen saˈ mateng, ndaˈ ilan tulugay, naa penleliagen ilan gupia! Mukaˈ taluˈu tuˈu diniu, su gegalen kia, megilis, dayun paingkudenen puˈ maan ki nga sesuguˈenen kia, iin masiˈi megilak dinilan. ³⁸ Pia mateng di meginengaˈi gebii, mesama da saˈ daliˈ endaw, saˈ maˈniai medetenganen, penleliagen su nga sesuguˈen! ³⁹ Mukaˈ pegdelendem niu pa pagidi gapuˈ balay. Saˈ pinenggiˈ mesuunan pedaan nu gapuˈ balay su kedateng nu getaw malap sia di pimetangen, ndiˈ ba megenduk, adun ndiˈ na sia mbegdakan sug dending nug balayen? ⁴⁰ Mendadi naan kini, kig Bataˈ nu Kilawan, lumusadu puliˈ di guras kanaˈ niu pedetengen. Kaas pengandam amu gusay.”

⁴¹ Mendadi, sinaakan ni Pedro si Isus mekatag di sambingayen kia, laungen, “Naa Sir, yami ba laaki tituluˈan mu dun, atawaka sug launan getaw?”

⁴² Kaliˈ sembag su Kaunutan, “Naa, adin su sesuguˈen meseligan mukaˈ telisebuten, iin dayuni pebiaˈen nu gegalenen tu nga sama sesuguˈenen, iini mekilas tu gaan nilan saˈ matengi kegilas dun. ⁴³ Saˈ mateng su gegalenen mukaˈ iini medetenganen, petuuden nu sesuguˈen su sinuguˈ diniin, naa leliagen su sesuguˈen kia! ⁴⁴ Taluˈu diniu tuˈu, saˈ maˈnia, pegwakil dayun nu gegalenen diniin su kelaunan pimetangen. ⁴⁵ Dagid saˈ dialem delendeman nu sesuguˈen, ‘Aa, su gegalen ku, maiben pa dateng,’ kaas pesaitanen su nga sama sesuguˈenen libun saˈ laki mukaˈ meksidalu maan, meginum, dakus megbebulek, naa saˈ maˈnia, taˈ ma dayuni mpenggulaula? ⁴⁶ Duuni gendaw metekaw muliˈ su gegalenen di guras ndaˈen pedetengay. Mendadi, silutan dayun patiˈ nu gegalenen ki sesuguˈenen kia, dayun pedumaay tu nga getaw ndiˈ mekpetuud.

⁴⁷ “Adin su sesuguˈen mesuunanen su mauyaˈan nu gegalenen, laak ndiˈ mengandam mukaˈ ndiˈ dadema mekpetuud, bedasen gupia. ⁴⁸ Adin su ndiˈen mesuunan su mauyaˈan nu gegalenen, laak iini penggulaulaanen sug bantang badas, bedasen tuˈu, laak ndiˈ melebian. Adin su getaw melauni pegwakil diniin, melaun dademai saaken puliˈ diniin. Dayun su getaw melaun pai pesalig diniin, labi na melaun dademai pedetengen diniin.”

⁴⁹ Kaliˈ pektaluˈ si Isus, “Mendadi, iini luminusadu dun, puˈ adun tutudan ku su tibuuk lumbang. Melengas sia migleket na! ⁵⁰ Mukaˈ naan, duuni kelegenayu subay bunagen dinaan. Mibegatanu patiˈ, sampay da dun di gendaw metubusu na bunagay dun! ⁵¹ Laung niu dun ba, iini luminusadu dun, puˈ pesalabuuken kui getaw dinig dibabaw lumbang? Kanaˈ maˈantu! Taluˈu tuˈu diniu, iini mituaˈu dun dini, meguitu sumpakiˈ. ⁵² Puˈ pinenggiˈ lima tawani salapenan. Genat nandaw, meksumpakiˈ ilan, telu tawan dig dibaluy, dayun dig dibaluy, duaˈ tawan pelum. ⁵³ Meksumpakiˈ naig delendeman nu gamaˈ mukaˈ nug bataˈlaki, maˈnia dadema su ginaˈ mukaˈ sug bataˈlibun, meksumpakiˈ su penugangan libun mukaˈ su minugangan dun libun.”

⁵⁴ Naa miktaluˈ si Isus tu melaun getaw, “Mendadi, saˈ maitaˈ niui medikpel megdelem diin dapit sindepan, laung niu dayun megdupiˈ, megdupiˈ daan tuˈu. ⁵⁵ Mukaˈ saˈ mbatik niu dumuluki genus genat di gilidan gendaw, laung niu dayun, ‘Sungu memedes,’ memedes dayun. ⁵⁶ Dagid tautau da lai amu mekesuun! Metau amu mengatuk tuˈus dig benwa mukaˈ dig langit, mauma ndiˈ niu dadema maulug ki tuˈus dig basa kini nandaw?

⁵⁷ “Mauma dema ndiˈ amu memilang tu melengas sia penggulaulaan? ⁵⁸ Saladuaˈ diniu, saˈ uiten ka nu duminangat diniˈa tu pengukuman, penugaling mu iin pengamuyuˈay, selian niu duaˈ dia pa dalan pangay tu pengukuman. Puˈ tekaw mbuus tegelen ka egakay tuˈu tu kuis, dayun su kuis, pegwakila niin dayun tu pulis, dayun pirisuun ka nu pulis. ⁵⁹ Taluˈu tuˈu diniˈa, saˈ maˈnia, ndiˈa na mekeguaˈ tu pirisuan, subay megelaˈ pa sia biaday su selaˈan mu, ndiˈ na engkanan, pia selaad siin.”