¹ Naa duuni getaw pegladu, ngalanen si Lazaro. Kini si Lazaro, pegbenwa diag Betania, ilan nu nga pateden si Maria mukaˈ si Marta. ² (Si Maria kini, iin su migbunag kiin pagemut tu geksud nu Kaunutan si Isus mukaˈ pinunasen dun kig buuken. Su pateden si Lazaro, iin su migladu kia.) ³ Mendadi, pimuun si Isus nug duaˈ tawan libun kia mekpated, laung nilan, “Sir, pegladu ki petailen mu sambat si Lazaro.”

⁴ Mendadi kini si Isus, benaˈ midengegen, kaliˈ pektaluˈ, “Naa, ki kegladu kini ni Lazaro, kanaˈ iinig deksuˈanen su petayanen. Iini migladu dun, puˈ adun megleepig dengegan nu Megbebayaˈ, mukaˈ adun megleep dadema kig dengegan nug Bataˈ nu Megbebayaˈ.”

⁵ Naa si Isus, milelaat gupia dini Marta mukaˈ su pateden kia libun sampay si Lazaro. ⁶ Laak pia maˈantu, benaˈ misuunanen puˈ migladu si Lazaro, milangan pa duaˈ gebii. ⁷ Benaˈ mitektakig duaˈ gebii, laung ni Isus tu nga sakupen, “Mpuliˈ ita ditu Judea.”

⁸ “Aba, Sir,” simbag nu nga sakupen. “Mpuliˈa na pelum ditu, asa begua da betuay sia nu nga getaw Judea dia?”

⁹ Kaliˈ sembag si Isus, “Naa su gendaw, kanaˈ ba sepuluˈ buˈ duaˈ uras? Naa saˈ mpanawi getaw metaang di gendaw, ndiˈ medapal, puˈ maitaˈen su mekpedelag dig lumbang.^{a 10} Laak saˈ dagid mengelem, naa medapal, puˈ ndaˈi mekpedelag diniin.” ¹¹ Saˈ mideksuˈen teluˈay kia, miktaluˈ padun si Isus, “Naa su sambat ta si Lazaro, tinulug na. Dagid meditu dau niin, adun tenuden ku.”

¹² Kaliˈ sembag su nga sakupen, “Sir, saˈ tinulug da, mauliˈan da.”

¹³ Naa ki tinaluˈ ni Isus kia, pingmaˈananen dun, minatay si Lazaro. Laak laung dun nu nga sakupen, tulug laaki teluˈenen. ¹⁴ Saˈ maˈnia, pinluksad ni Isus dinilan, laungen, “Minatay na si Lazaro. ¹⁵ Laak dagid sabaˈ diniu,” maaˈ laung pa ni Isus, “liliagu dun puˈ ndaˈu ditu, puˈ adun sumalig amu dinaan. Naa laawan taitu.”

¹⁶ Mendadi sala tawan dinilan si Tomas (piningalan dun su Gapid), laungen tu nga samasakupen kia, “Naa megdunut daita dema di Mekpetuˈun dinita, adun saˈ petain, meksaliunung daita diniin!”

¹⁷ Naa benaˈ minateng si Isus diag Betania, pisuun diniin puˈ paat gebii na dig lupaˈ si Lazaro. ¹⁸ Naa kig lunsud Betania kia, duun saani telu kilumitru laakig layuˈen tu Jerusalem. ¹⁹ Saˈ maˈnia, melaun getaw Judea miditu ni nga Marta mukaˈ si Maria, adun megbelangbelang ilan di ginaa nilan mekatag di kepatay nu pated nilan kia.

²⁰ Naa si Marta, benaˈ midengegen puˈ pegdateng si Isus, inangayen sungkakay, laak si Maria, mibilin diag balay nilan. ²¹ Mendadi kini si Marta, kaliˈ pektaluˈ dini Isus, “Sir, saˈ sia diniin ka, ndiˈ sia matay su patedu! ²² Dagid pia maˈantu, suunan ku puˈ adini penengiin mu tu Megbebayaˈ, begayen diniˈa.”

²³ “Metubuˈ puliˈ ki pated mu kiin,” laung ni Isus.

²⁴ “Naa suunan ku,” simbag ni Marta, “petubuˈen puliˈ nu Megbebayaˈ su nga getaw di gendaw kiin saˈ sungu na melengkebig benwa, kaas metubuˈ daan puliˈ si Lazaro.”

²⁵ Kaliˈ pektaluˈ si Isus diniin, “Naani mekpetubuˈ puliˈ tu nga getaw, mukaˈ naan dademai puun nu ketubuˈ nu getaw. Adin su getaw metuudan dinaan, pia matay, metubuˈ puliˈ. ²⁶ Mukaˈ adin su metubuˈ mukaˈ sumalig dinaan, ndiˈ na matay iin. Metuudan ka dun?”

²⁷ “Waˈa, Sir!” simbag ni Marta. “Mituudanu dun puˈ yaˈa na tuˈu su Tinduˈ nu Megbebayaˈ Meglekaunutan, sug Bataˈ nu Megbebayaˈ, su pidateng nami lumusad dinig lumbang.”

²⁸ Benaˈ mideksuˈ mektaluˈ si Marta, minangay meksabi tu pateden kia si Maria. Kimeden dun dayun, laungen, “Diin na su Mekpetuˈun, sinabia niin.” ²⁹ Kaliˈ medengeg ni Maria, migdedaliˈ megbuat, miditu dayun sumungkak dini Isus. ³⁰ (Puˈ ndaˈ pa dateng diag lunsud si Isus, ditu pa tandaˈ nu pekitaˈan nilan ni Marta.) ³¹ Naa su nga getaw Judea kia megbelangbelang dini Maria diag dialem balay, benaˈ minitaˈ nilan si Maria migdedaliˈ megbuat mukaˈ luyu, lindug nilan, puˈ laung nilan dun meditug lebeng lumalek.

³² Naa si Maria, benaˈ minateng dia ni Isus, miglaub di gedapanen. “Uu Kaunutan,” laungen, “saˈ sia diniin ka, ndiˈ sia matay su patedu!”

³³ Mendadi si Isus, saˈ minitaˈen si Maria luminalek sampay su ngag dumanen getaw Judea luminalek dailan dema, misasawi ginaanen, milegenan patiˈ. ³⁴ “Adin niu libeng?” sinaaken.

Kaliˈ ilan sembag, “Naa Sir, unutan ka nami ditu, adun maitaˈ mu.”

³⁵ Mikengaduy si Isus. ³⁶ Laung nu nga getaw dia, “Pegbentayay pa daan niu, mikpetail gupia dini Lazaro.”

³⁷ Laak sug duma, laung nilan, “Naa, pipengitaˈ nu getaw kini sug buta. Mauma ndaˈen ma metabangi gumul ni Lazaro?”

³⁸ Benaˈ minateng si Isus tug lebeng ni Lazaro, mipatiˈ puliˈ mesasawi ginaanen. Naa kig lebeng kia, sinangyab, tinakep gembagel batu. ³⁹ Laung dayun ni Isus, “Pegawaˈ niuig batu kia!”

“Dagid Sir,” laung ni Marta, su pated nu minatay kia, “paat gebii na dig lupaˈ! Meduˈ na.”

⁴⁰ Kaliˈ sembag si Isus, “Naa, ndaˈ bau pektaluˈ diniˈa puˈ saˈ sumaliga dinaan, maitaˈ mu ki kelengas nu pegbayaˈ nu Megbebayaˈ?” ⁴¹ Inawaˈ nilan dayun su gembagel batu. Migangag dayun si Isus, kaliˈ pektaluˈ, “Uu Amaˈ, mikpaladpaladu diniˈa, puˈ mipenembaˈ mui kenengiu. ⁴² Misuunan ku gebii gendaw pekineegan mau, laak iini mipedengegu dun ki kenengiu diniˈa kini, sabaˈ nu nga getaw kini, puˈ adun metuudan ilan dun puˈ sinuguˈ mau lumusad dinig lumbang.”

⁴³ Mideksuˈ menenabi si Isus, minekeg dayun meksabi, laungen, “Uu Lazaro, guaˈa na dini!” ⁴⁴ Gumiwaˈ dayun si Lazaro. Laak linibedan pa penepeten sampay su kemeten mukaˈ geksuden, pinutus dema tulapuki gulunen. “Ubaday niu,” laung ni Isus, “adun mekepanaw.”

⁴⁵ Naa melaun getaw tumindug dini Maria, mituudan ilan dini Isus saˈ minitaˈ nilan su pinggulaulanen kia. ⁴⁶ Laak sug duma, miditu ilan nga Pariseo, pisuun nilan dayun dun ki pinggulaula kia ni Isus. ⁴⁷ Mendadi ki nga Pariseo kini mukaˈ ki nga kaunutan nug belian nu getaw Judea, mikpungun ilan dayun, ilan nu Pikumpungan nu Metaas Gukum nilan. Kaliˈ ilan pektaluˈ, “Naa, alanduni melengas baalen ta? Melaun mekesalebuˈ pinggulaula nu getaw kiin! ⁴⁸ Saˈ ndiˈ ta pemaagen, megelaˈ sumakup diniin su nga getaw. Mbuus medengeg nu gubirnu ditug Roma, suguˈen nilan dayuni nga sundalu medini, peglaatan nilan dayuni gelal ta kaunutan, puˈ gebaˈen nilan su Pengedapan ta tu Megbebayaˈ mukaˈ leneden nilani nasud ta!”

⁴⁹ Mendadi sala tawan dinilan si Caifas, iini mitenduˈ Tampusan Metaas Belian di taun kia, kaliˈ pektaluˈ, “Paa, benguˈbenguˈen amu! ⁵⁰ Ndaˈ niu ba mesuunay puˈ melengas pa pegantiˈ ta ki sala tawan di kepatay nug launan getaw batul nu megelaˈ matay su tibuuk bansa ta?” ⁵¹ Naa kagina iini Tampusan Metaas Belian, ki tinaluˈ kini ni Caifas, kanaˈ daniin delendeman. Pidelendem diniin nu Megbebayaˈ puˈ gumantiˈ di nga getaw Judea si Isus. ⁵² Mukaˈ kanaˈ laak su kepatay nu nga getaw Judea ki gentiˈenen, puˈ pesalabuukenen pa pagid su kelaun piglegetawan nu Megbebayaˈ misigwag dig dibabaw lumbang.

⁵³ Mendadi genat tu gendaw kia, ki nga kaunutan kini nu getaw Judea, minengaw ilan suˈatan nilan di kepatay nilan dini Isus. ⁵⁴ Saˈ maˈnia, ndaˈ pekpaitaˈ si Isus mekpanawpanaw dia Judea. Miditug lunsud Efraim tu geksid limawaˈ, migbebenwa dia, ilan nu nga sakupen.

⁵⁵ Naa saˈ sungu na mektelipuun sug Lumpuk tug Liniusan, melaun getaw tumiwad ditu Jerusalem genat dig lumibut benwa, minangay ilan mekanu adun mawaˈ su kelemuˈay nilan. ⁵⁶ Naa pekpenengaun nu nga getaw dia Jerusalem si Isus. Saˈ mikpungun ilan ditug Balay Pengedapan tu Megbebayaˈ, miksinaakay ilan, laung nilan, “Naa, taˈi ketaluˈ niu dun? Si Isus, mabuˈ ndiˈ sumaup dig Lumpuk kini?” ⁵⁷ Puˈ su nga kaunutan nug belian mukaˈ nga Pariseo kia, pilaktag nilan tu nga getaw, saˈ duuni mekesuun dun saˈ adin si Isus, subay pesuunen dinilan, adun daapen nilan iin.