¹ Naa saˈ genem gebii pa mektelipuun sug Lumpuk tug Liniusan, miditug Betania si Isus, sug lunsud ni Lazaro, su pitubuˈ puliˈ kiin ni Isus. ² Benaˈ minateng dia si Isus, pigbesaan nu nga getaw dia di gaan. Iini migilak dun si Marta, dumingan dini nga Isus maan si Lazaro. ³ Mendadi benaˈ pekaan nailan, si Maria, minalap sala butilya melagaˈ pagemut piningalan dun nardo, binunagen dayun di geksud ni Isus mukaˈ pinunasen dun sug buuken. Mileep dayun tu seled balay su sapu nu pagemut. ⁴ Naa sala tawan sakup ni Isus, si Judas Iscariote, su tumipu pa dini Isus, kaliˈ pektaluˈ, ⁵ “Baa, mauma dema ki pagemut kiin, ndaˈ ma peksaluy, mabuˈ malin sia telu gatus denario, adun begay tu nga pubri su galinen?” ⁶ Laak kanaˈ iini tinaluˈ dun ni Judas puˈ melelaat tu nga pubri. Tinaluˈen duni maˈnia, puˈ megdaaw. Kagina iini meguit tu kwarta ni nga Isus, taang dun malap dun.

⁷ Dagid miktaluˈ si Isus, “Aba, maˈnia da! Melengas teguˈenen, pengandamen di gendaw nu kelebeng dinaan. ⁸ Su pubri, lelayun niu mpungun megbenwa. Naan dagid, kanaˈ nau maiben dumuma diniu dini.”

⁹ Naa su nga getaw miglumpuk dia Jerusalem, benaˈ midengeg nilan puˈ minateng na si Isus ditug lunsud Betania, miditu dailan dema, melaun ilan gupia. Mauyaˈan nilan kitaˈen nilan pa pagid si Lazaro, su pitubuˈ puliˈ ni Isus. ¹⁰ Mendadi sug delendeman nu nga kaunutan nug belian, petain da nilan dema si Lazaro, ¹¹ puˈ iini puunanen, melaun getaw Judea sumiway dinilan, suminakup ilan dini Isus.

¹² Naa benaˈ migendaw, su nga melaun getaw kia suminaup tug Lumpuk, midengeg nilan pegdateng si Isus dia Jerusalem. ¹³ Mendadi mingalap su nga getaw paka pisa pegbaasbaas nilan basa nilan dini Isus, dayun lumiu ilan diag lunsud, sungkaken nilan si Isus. Mimeksay ilan, laung nilan, “Pegbesaan kini! Melengas pepianan iin nu Megbebayaˈ, ki minateng na pigwekilan nu Kaunutan Megbebayaˈ, ki Gadiˈ nu getaw Israel!”

¹⁴ Mendadi kini si Isus, duuni minitaˈen petubuˈen nati asno. Sikayanen dayun, maaˈ dadema nu sinulat pedaan ditu Misulat Taluˈ nu Megbebayaˈ, laung,

¹⁶ Naa su nga sakup ni Isus, ndaˈ nilan mesabut di gendaw kia saˈ taˈ mai suminakay dun si Isus. Laak benaˈ midayag na su kelengas nu pegbayaˈ ni Isus, milabuˈ dayun dig delendeman nilan su sinulat kia ditu Misulat Taluˈ nu Megbebayaˈ, dakus su kenggulaula nilan dun diniin di gendaw kia.^b

¹⁷ Naa su nga melaun getaw tumindug dini Isus su kesabinen dini Lazaro ditug dialem sangyab dayunen petubuˈay puliˈ, inukitan nilan dun su nga getaw pegbebenwa dia Jerusalem. ¹⁸ Iini minangay dun sumungkak dini Isus su nga getaw, puˈ midengeg nilan ki mekesalebuˈ pinggulaulanen kia. ¹⁹ Mendadi ki nga Pariseo, kaliˈ nilan pegyegayegaay, “Naa, bentayay pa daan niu, daagen ita! Minampuˈ na diniin su tibaˈan getaw!”

²⁰ Naa duuni nga getaw Grecia minampuˈ di nga getaw Judea mangay dia Jerusalem mengamuyuˈ tu Megbebayaˈ metaang dig Lumpuk kia. ²¹ Mendadi ilan kini, luminabet ilan dini Felipe, (si Felipe, getaw Betsaida sakup Galilea). Kaliˈ ilan pektaluˈ diniin, “Sir, kumitaˈ ami sia dini Isus.”

²² Saˈ maˈnia, linaawan ni Andres si Felipe, pisuunen diniin su kenengi nu getaw Grecia, dayun ilan duaˈ mangay mekpesuun dini Isus. ²³ Mendadi benaˈ midengeg ni Isus, kaliˈ pektaluˈ, “Naa, mitektak na su sesaˈ. Naan kini, kig Bataˈ nu Kilawan, begay na dinaan nu Megbebayaˈ su kelengas nu pegbayaˈu. ²⁴ Taman taluˈu diniu, pinenggiˈ su sebalu trigo, saˈ ndiˈ metenaˈ tug lupaˈ mukaˈ lebengen, ndaˈi pulesen. Laak saˈ metenaˈ tug lupaˈ mukaˈ lebengen, iini sungkuˈ gupia.^{c 25} Naa adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen, iin, malapen sungkin su ketubuˈ ndaˈi tamanen. ²⁶ Mendadi saˈ duuni getaw mauyaˈanen megabang dinaan, iin, subay dumunut dinaan. Pia tandaˈu, ditu dadema iin. Saˈ megabang dinaan, iin demai pegbesaan nu Gamaˈu.”

²⁷ Kaliˈ pektaluˈ si Isus, “Milegenanu ini. Ndiˈu mesuunani gempia penenebiin ku. Penenebiin ku taˈ, ‘Uu Amaˈ, gawen mau di kelegenayu’? Ndiˈ mesuˈat, puˈ iini luminusadu dun dinig lumbang, adun melegenanu.” ²⁸ Minenabi dayun si Isus, laungen, “Uu Amaˈ, pegleep mu sug dengegan mu!”

Duun dayuni miktaluˈ ditug langit, laungen, “Pigleepu na sug dengegan ku mukaˈ pegleepen ku pa puliˈ.”

²⁹ Benaˈ midengeg nu melaun getaw pegindeg dia, laung dun nug duma, limuduˈan. Laung dun pagid nug duma, “Mabuˈ duuni sesuguˈen nu Megbebayaˈ getaw langit migabitabit diniin!”

³⁰ Dagid kaliˈ pektaluˈ si Isus, “Kanaˈ naani pidengegan dun ki tingeg kiin, pidengeg diniu. ³¹ Puˈ minateng nai gendaw tinduˈ nu Megbebayaˈ, ukumanen su tibaˈan getaw. Nemun su meglekaunutan di tibaˈan getaw, su Palin, daagen iin. ³² Naan, saˈ mainatu adun melansangu dia, empunen ku sug launan getaw megelaˈ mekesakup dinaan.” ³³ (Iini miktaluˈ dun si Isus, puˈ adun mesuunan nu nga getaw kig bian nu kepatayen.)

³⁴ Kaliˈ sembag su melaun getaw, “Naa iini mipesuun dinami nu Palinta dinami kanugdiin, puˈ su Tinduˈ nu Megbebayaˈ Meglekaunutan, ndaˈi gumulen. Naa saˈ maˈantu, saˈ iinig laung mu Bataˈ nu Kilawan, mauma tinaluˈ mu mainat iin adun melansang dia? Taˈ taway duni Bataˈ nu Kilawan kiin?”

³⁵ Kaliˈ sembag si Isus, “Taman taluˈu diniu, ki Tiag kini, ndiˈ na maiben di mata niu, kaas sinegay dini pa su Tiag, bundas amu panaw, adun ndiˈ amu medepetan nu medelem. Adin su mpanaw di medelem, ndiˈen mesuunani gengayanen. ³⁶ Selian diin pa mata niu, subay metuudan amu tu Tiag, adun mbaal amu sakup nu Tiag.”

Mendadi sikna mideksuˈ mektaluˈ si Isus, bilenganen su nga getaw kia, pigliawen ilan dayun. ³⁷ Puˈ pia melaun mekesalebuˈ pinggulaulanen dia gedapan nilan, ndaˈ ilan metuuday dun diniin. ³⁸ Maˈnia, minuud su sinulat dengantu nu pimuunan nu Megbebayaˈ si Isaias, laungen,

³⁹ Saˈ maˈnia, su nga mikaitaˈ tu mekesalebuˈ pinggulaula ni Isus, ndaˈ ilan metuuday dun. Puˈ duun pagidi sala sinulat ni Isaias, laungen,

⁴¹ Iini miktaluˈ dun si Isaias maˈnia, puˈ minitaˈen su kelengas nu pegbayaˈ ni Isus, dayun inukiten.

⁴² Pia maˈantu, melauni kaunutan nu getaw Judea mituudan dini Isus, laak pigbuni nilan. Ndaˈ nilan pekpailag, puˈ mindek ilan mbuus utidan ilan nu nga Pariseo di simbaan nu getaw Judea. ⁴³ Iini mauyaˈan nilan, pegbesaan ilan nu nga getaw, sabayaˈ nu Megbebayaˈ.

⁴⁴ Naa mendadi, minekeg mektaluˈ si Isus, laungen, “Adin su metuudan dinaan, kanaˈ naan laak su pituuden, puˈ pituuden dadema su suminuguˈ dinaan. ⁴⁵ Mukaˈ adin su getaw mekaitaˈ dinaan, maitaˈen dadema su suminuguˈ dinaan. ⁴⁶ Naani Tiag, midiniinu lumbang adun pedelagan ku sug delendeman nu nga getaw. Adin su getaw metuudan dinaan, ndiˈ metenlen di medelem. ⁴⁷ Mukaˈ, adin su mekedengeg tu taluˈu, asa ndiˈen pektalentenan, kanaˈu mukum dun. Puˈ kanaˈ iini midiniinu dun puˈ adun mengukum tu nga getaw, segaga iin sungkini midiniinu dun, guunen ku su nga getaw. ⁴⁸ Adin su memilas dinaan mukaˈ memilas dadema tu taluˈu, duuni mengukum dun. Su tinaluˈu, iini mengukum dun saˈ sungu melengkebig benwa. ⁴⁹ Di menepet metuud lai daan, kanaˈ mikpuun tu pegbayaˈu su tinaluˈu, iini tinaluˈu tu nga getaw, su laak sinuguˈan dinaan nu Gamaˈ ta. ⁵⁰ Suunan ku su sinuguˈanen, iini megbegay ketubuˈ ndaˈi tamanen, kaas iini tinaluˈu, su sinuguˈan dinaan nu Gamaˈ ta.”