¹ Naa benaˈ mideksuˈen su kelaun tinituluˈen kia, miktaluˈ si Isus tu nga sakupen, ² “Naa misuunan niu puˈ duaˈ gebii pa mektelipuun sug Lumpuk tug Liniusan. Mendadi saˈ mektelipuun na, naan kini, kig Bataˈ nu Kilawan, pegwakilu ditu getaw, adun lensangenu nilan di kurus.”

³ Mendadi ki nga kaunutan nug belian mukaˈ ki ngag duma kaunutan nu getaw Judea, mikpungun ilan tug balay nu Tampusan Metaas Belian, si Caifas. ⁴ Puˈ iini peksebutsebutan nilan, ki kedaap nilan dini Isus, puˈ adun pepatay nilan iin. Laak pigunguban nilan, ⁵ laung nilan, “Ndiˈ mesuˈat metaang dig Lumpuk, puˈ buus menlimuuk su nga getaw.”

⁶ Naa si Isus, sinegayen ditu pelum Betania, inggat maan diag balay ni Simon, su getaw kiin minayan megladu mekesalebuˈ nuka. ⁷ Benaˈ saanan ni Isus maan, duuni minadap diniin libun peguit bataˈ bandi gemputiˈ, mipenuˈ pagemut, melagaˈ gupia. Mendadi benaˈ mikpesempel dini Isus sug libun, binunagen dayun di gulu ni Isus. ⁸ Dagid dekag minitaˈ nu nga sakup ni Isus, milaati ginaa nilan dun, laung nilan, “Baa, mauma dema ki pagemut kia, pikulaˈulaˈan laak? ⁹ Iin siai melengas, piksaluy sia, mabuˈ malin pa sia melaun, dayun begay tu nga pubri su galinen!”

¹⁰ Dagid misuunan ni Isus su pekteluˈen nu nga sakupen kia, kaas miktaluˈ dinilan, “Mauma libulengen ma niuig libun kini? Ki pinggulaulanen dinaan, melengas. ¹¹ Su pubri, lelayun niu mpungun megbenwa. Naan dagid, kanaˈ nau maiben dumuma diniu dini. ¹² Naa ki pinggulaula nug libun kini, maˈananen, pigupiananen pedaanig lawasu di kelebeng sungu dinaan. ¹³ Mendadi taman taluˈu diniu, pia adin pegukit su Gempia Petenday dinig dibabaw lumbang, naa mpeduma dun dadema pegukit ki pinggulaula nig libun kini, puˈ adun ndiˈ iin melingawan.”

¹⁴ Mendadi kini si Judas Iscariote, sala tawan di nga sepuluˈ buˈ duaˈ peneligan ni Isus, linaawanen su nga kaunutan nug belian nu getaw Judea. ¹⁵ Suminaak si Judas dinilan, “Mendadi si Isus kiin, saˈ tipuun ku diniu, alandun mai begay niu dinaan?” Mendadi ki ngag belian kini, binilang nilan dayuni telu puluˈ laad siin pelata, tinulun nilan dayun dini Judas. ¹⁶ Kaas genat nitu, si Judas kini, piksuˈatsuˈaten dayuni sikawen tumipu dini Isus.

¹⁷ Mendadi, benaˈ minateng sug bekna gendawan nug Lumpuk di Pan ndaˈ Petulinay, minadap dini Isus su nga sakupen, suminaak ilan diniin, “Sir, kig Lebungan ta tug Liniusan, adin mu ami paulingelay?”

¹⁸ Kaliˈ sembag si Isus, “Bundas amu ditu syudad. Saˈ mateng amu ditu, laaway niu si Uan kia. Naa saˈ mateng amu ditu niin, taluˈ niu dayun diniin, ‘Naa, pimuun nu Mekpetuˈun, laungen, Sungu na metektaki sesaˈu. Kaas dini nami maan Lebungan nami tug Liniusan, yami nu nga sakupu, dinig balay mu.’”

¹⁹ Pituud dayun nu nga sakup ni Isus su sinuguˈanen dinilan kia. Pigulingel nilan dayun sug Lebungan nilan tug Liniusan.

²⁰ Naa benaˈ misindepi gendaw, mingingkud maan si nga Isus, ilan nu nga sepuluˈ buˈ duaˈ tawan sakupen. ²¹ Mendadi, benaˈ pekaan nailan, kaliˈ pektaluˈ si Isus dinilan, “Taman taluˈu diniu, ki sala tawan diniu, mektipu dinaan.”

²² Milibuleng dayun su nga sakup ni Isus. Miglimbuslimbus ilan sumaak diniin, “Asa uu Kaunutan, kanaˈ da sia naani pekteluˈen mu kiin?”

²³ Sumimbag si Isus, “Sala tawan lai suminalu gupia dinaan kini, iini tumipu dinaan. ²⁴ Puˈ naan kini, kig Bataˈ nu Kilawan, mbinasau tuˈu, maaˈ dadema nu misulat pedaan ditu Taluˈ nu Megbebayaˈ. Laak dagid pia maˈantu, ki getaw mektipu dinaan, kig Bataˈ nu Kilawan, mekelelaatlelaat gupia! Tumuˈ pa ndaˈ na sia pegigetawi getaw kiin!”

²⁵ Kini si Judas, su mektipu kia dini Isus, suminaak dayun diniin, “Asa Sir, kanaˈ dema tuˈu naan?”

“Maˈnia da, yaˈai miktaluˈ dun,” simbag ni Isus.

²⁶ Mendadi benaˈ maan ilan, minalap si Isus pan, mikpaladpalad dayun tu Megbebayaˈ. Pimetanen dayun su pan, dayunen pentulunay dia nga peneliganen. Kaliˈ pektaluˈ, “Naa, alap amu dun ini, aan niu. Kini sug lawasu.”

²⁷ Minalap pelum si Isus sala tasa penginumen. Benaˈ mikpaladpalad na puliˈ tu Megbebayaˈ, dayunen tulunay dia nga sakupen ki tasa kini. Kaliˈ pagid pektaluˈ dinilan, “Naa, inum amu dun ini, launan niu. ²⁸ Kini sug duguˈu, ki mekigis na, adun mpedasun su salaˈ nu melaun getaw. Kig duguˈuig bian nug begu pasad nu Megbebayaˈ. ²⁹ Mendadi, taman taluˈu diniu, genat nandaw, ndiˈ nau puliˈ minum di penginumen kini, sampay da dun mateng su gendaw meglekaunutan na tuˈu su Gamaˈu. Dekag paita pegdengan minum dig begu ginis penginumen ditu Keglekaunutanen.”

³⁰ Naa benaˈ mitubus si nga Isus maan Lebungan nilan, migbebat ilan kegenal tu Megbebayaˈ, dayun ilan mengguaˈ dia, tumiwad ilan tug Bentud nu nga Gayu Olibo.

³¹ Mendadi, kaliˈ pektaluˈ si Isus tu nga peneliganen, “Yamu kini, mbuus laak gebii kini, megelaˈ amu tuliud dinaan. Puˈ iini misulat ditu Taluˈ nu Megbebayaˈ, ‘Miktaluˈ su Megbebayaˈ, petain ku ki megingat tu karniru, dayun mesigwag su nga karniru pegingatenen.’” ³² Maaˈ laung pa ni Isus, “Dagid benaˈ genatu petubuˈay puliˈ, megunau diniu ditu Galilea.”

³³ Miktaluˈ si Pedro, “Aba, Sir, pia teliudan ka nu nga kelaun dumau, naan kini, ndiˈ nau gusay tuliud diniˈa!”

³⁴ “Taman taluˈu diniˈa,” laung ni Isus, “dekag pasiˈ peguni su manuk gebii kini, metelu deksuˈa na memalaw puˈ kanaˈ mau mailala.”

³⁵ Dagid miktaluˈ si Pedro, “Pia mekendutaˈ, saliunungan ku yaˈa, ndiˈu da lai pemelaun puˈ kanaˈu yaˈa mailala!”

Mukaˈ su kelaun sakup ni Isus, maˈnia dademai penteluˈen nilan.

³⁶ Naa minundas si Isus tu pegimulanan gayu piningalan dun Getsemane, ilan nu nga sakupen. Benaˈ minateng ilan dia, kaliˈ pektaluˈ si Isus dia nga sakupen, “Naa pegingkud amu deliˈ dini, puˈ mundas pau dia gunaan, menenabi pau dia.” ³⁷ Dayun iwiten dumanen si Pedro mukaˈ sug duaˈ tawan kiin bataˈ ni Sebedeo. Mendadi benaˈ melayuˈlayuˈ nailan diag duma nilan, milegenan patiˈ si Isus, diduaˈani ginaanen. ³⁸ Laungen dayun dia telu tawan dumanen, “Milegenanu ini, mibegatanu dun patiˈ, maˈniin na petayan ku ini. Kaas dini damu dun deliˈ, dumanay niau megenduk.”

³⁹ Minundas kemaikaˈ dia gunaan si Isus, dayun miglaub dig lupaˈ, kaliˈ penenabi, “Uu Amaˈu, saˈ sia mesuˈat diniˈa, ki tasa mipenuˈ nug lesayan ku sunguu na inumay, naa peliaw sia dinaan, adun ndiˈu na mainum! Laak dagid, Amaˈ, sug daniˈa mauyaˈan, iini penuuden, kanaˈ nug danaan.”

⁴⁰ Naa saˈ maˈnia, pinuliˈan ni Isus su telu tawan sakupen kia. Midetenganen, tinulug ilan. Sinabi dayun ni Isus si Pedro, laungen, “Taˈ itu, masiˈ ndaˈ na niau megaga dumanay megenduk, pia laak sauras? ⁴¹ Baa,” laung ni Isus, “peglengilam amu mukaˈ penenabi amu daan, adun ndiˈ amu mpenulay. Puˈ dig delendeman niu, gangut niu sia mekpetuud amu tu mauyaˈan nu Megbebayaˈ. Dagid su kekilawan niu, melubay, ndiˈ mekpetuud dun.”

⁴² Mipanaw na puliˈ si Isus, minenabi na puliˈ, laungen, “Uu Amaˈu, saˈ ndiˈ mesuˈat peliaw dinaan ki tasa mipenuˈ nug lesayan ku kini subay inumen ku, naa maˈantu da, senguˈen ku kig daniˈa laak delendeman kia.” ⁴³ Mendadi, kaliˈen puliˈay pelum su nga peneliganen, iin da gusayi mitaanganen, tinulug ilan pelum, puˈ ndiˈ nilan metigeli tulug nilan.

⁴⁴ Naa saˈ maˈantu, mipanaw na puliˈ si Isus, minenabi di ketelu deksuˈen, miksama da gusayi kenenabinen. ⁴⁵ Dayunen puliˈay pelum su nga sakupen kia, kaliˈ pektaluˈ dinilan, “Taˈ ma, tinulug pamu gusay, milali amu? Naa ma, mitektak na su sesaˈ! Mendadi naan kini, kig Bataˈ nu Kilawan, pegwakil nau tuˈu tu pegbayaˈ nga kanaˈ megbasa tu Megbebayaˈ. ⁴⁶ Kaas pegbuat amu, mpanaw naita. Bentayay pa daan niu, kiin na tuˈu ki tumipu dinaan!”

⁴⁷ Mendadi ndaˈ pa medeksuˈ mektaluˈ si Isus, misebang si Judas, ki sala tawan kiin di sepuluˈ buˈ duaˈ peneligan ni Isus. Melaun gupia getaw tumindug dini Judas kini, peguit ilan badung mukaˈ bentul, sinuguˈ ilan nu nga kaunutan nug belian mukaˈ sug duma kaunutan nu getaw Judea. ⁴⁸ Naa si Judas, ki tumipu dini Isus, duuni tuˈus gandang bigayen di ngag dumanen kia, puˈ tinaluˈen dinilan, “Adin su getaw elekan ku, iinen na su penengaun niu. Daap niu dayun!”

⁴⁹ Mendadi kini si Judas, tuminuun dayun madap dini Isus. Kaliˈ pektaluˈ, “Uu Sir, gempia dai ginaa mu!” Dunut ilekanen si Isus.

⁵⁰ Laung ni Isus, “Naa, Sambat, kig baalen mu, baal mu ganam!”

Mikpesempel ilan dini Isus, dinaap nilan dayun. ⁵¹ Naa sala tawan duma ni Isus, migbakut badungen, dayunen tigbasayi gulipen nu Tampusan Metaas Belian nu getaw Judea, miseksipi sedibaluy telinganen. ⁵² Dagid laung ni Isus, “Baa, gumaˈ muig badung mu kiin. Puˈ adini getaw memunuˈan, bunuˈ dademai palas nu kepetayanen. ⁵³ Keduaˈen, ndaˈ mu masiˈ mesuunay puˈ mesuˈatu mekpaingabang ditu Gamaˈu, duun dayuni petuaˈenen sesuguˈenen getaw langit, kanaˈ da dun santaˈ laksaˈ, adun sumugut dinaan? ⁵⁴ Laak dagid saˈ pinenggiˈ maˈniai mpenggulaula, naa kendutaˈ mai kenuud nu sinulat ditu Misulat Taluˈ nu Megbebayaˈ puˈ maˈnini tuˈui mpenggulaula?”

⁵⁵ Miktaluˈ dayun si Isus dia nga melaun getaw kia, “Naa, tulisan bau, kambat amu meguit badung mukaˈ bentul saˈ daapen niau? Asa gendawgendaw, migingkudu dia Pengedapan tu Megbebayaˈ, mikpetuˈunu dia, laak ndaˈ niau daapay. ⁵⁶ Laak dagid kini, subay mpenggulaula daan, adun menuud su sinulat dengantu nu nga pimuunan nu Megbebayaˈ ditu Taluˈen.”

Naa saˈ maˈnia, bilengan dayun si Isus nu nga sakupen, mimeglaguy ilan, launan nilan.

⁵⁷ Naa saˈ maˈantu, inagak si Isus nu nga migdaap diniin ditug balay nu Tampusan Metaas Belian nu getaw Judea, si Caifas. Mipungun dia su nga mekpetuˈun di Palinta nu Megbebayaˈ mukaˈ su nga kaunutan nu getaw Judea. ⁵⁸ Naa si Pedro, miglendug dadema di melayuˈlayuˈ, gikteb laak diag lenuˈan nug balay kia. Benaˈ minateng dia, luminamug dayun si Pedro di nga megingat pemegingkud dia, adun mesuunanen saˈ taˈi mpenggulaula. ⁵⁹ Mendadi ki nga kaunutan nug belian kia dakus ki tibuuk Pikumpungan nu Metaas Gukum nu getaw Judea, minengaw ilan sia pembaalbaal takesiˈ mekatag dini Isus, puˈ adun maukuman iin petain. ⁶⁰ Laak dagid pia melaun minadap dinilan menakesiˈ tu pimbaal dini Isus, mibulugan laak su nga kaunutan kia menengaw gempia dangat nilan diniin. Tigaˈwan, migindeg di gedapanig duaˈ tawan, ⁶¹ kaliˈ ilan pektaluˈ, “Naa ki getaw kini, tinaluˈen, ‘Ki Pengedapan daw tu Megbebayaˈ, megagau da gebaˈay. Dayun gikteb telu endaw, baalen ku puliˈ.’”

⁶² Mendadi, migindeg na su Tampusan Metaas Belian kia. Sinaakanen dayun si Isus, laungen, “Naa, ndaˈidun bai sembag mu di tinakesiˈ ni nga getaw kini mekatag diniˈa?” ⁶³ Dagid ndaˈ sembag si Isus. Kaliˈ pektaluˈ su Tampusan Metaas Belian, “Mendadi, pesepaan ku yaˈa, sembayan ku su Megbebayaˈ ndaˈi gumulen, pemantek mu na dinami, yaˈa ba tuˈu su Tinduˈ nu Megbebayaˈ Meglekaunutan, kig Bataˈ nu Megbebayaˈ?”

⁶⁴ Sumimbag si Isus, “Naa, maˈnia da, yaˈai miktaluˈ dun. Dagid taman taluˈu diniu, duuni gendaw mateng, naan kini, kig Bataˈ nu Kilawan, maitaˈ niau, pegingkudu tuˈu ditu dapit lintu nu Tampusan Ginuungan! Dakus maitaˈ niau, lumusadu puliˈ dinig lumbang kini, metuaˈu di gabun dia gawanawan!”

⁶⁵ Naa, apelai. Ki Tampusan Metaas Belian kini, kaliˈen medengeg pilepeng ni Isus sug lawasen tu Megbebayaˈ, lingetan dini Isus sug Belian. Giditen su penepetenen, kaliˈ pektaluˈ, “Paa, piksudiˈanen su Megbebayaˈ! Ndiˈ ta na kambat dugangan su takesiˈ! Puˈ midengeg na niu ki keksudiˈen tu Megbebayaˈ! ⁶⁶ Mendadi, alanduni kitab niu dun?”

Simbag nu nga gukum, “Bantang na petain.”

⁶⁷ Saˈ maˈnia, pindulaˈan nilan ki muluˈ ni Isus, dayun nilan denegay. Duun pa pagidi tuminampaling diniin, ⁶⁸ kaliˈ ilan pektaluˈ, “Naa, saˈ sia metuud puˈ yaˈa su Tinduˈ daw nu Megbebayaˈ Meglekaunutan, suunan ka, atuk mu saˈ taway dun dinamii mikpesait diniˈa!”

⁶⁹ Naa si Pedro, pegingkud diag liu, diag lenuˈan nu pengukuman. Mendadi, duuni sala tawan delaga, sesuguˈen nu Tampusan Metaas Belian nu getaw Judea, mikpesempel dini Pedro, kaliˈ pektaluˈ, “Uy, yaˈa kiin, dumaa pagid ni getaw Galilea kiin, si Isus.” ⁷⁰ Dagid mimalaw si Pedro di gedapan nu melaun getaw mipungun dia. “Baa,” laungen, “ki teluˈen mu kiin, ndiˈu lai mesabut.” ⁷¹ Migawaˈ dayun dia si Pedro. Benaˈ dia na mesempel dig bisuangan, minitaˈ na pelum ni sala delaga, sesuguˈen dadema. Laung nug delaga dia nga getaw pegindeg dia, “Ki getaw kini, duma ma nu getaw Nazaret kiin, si Isus.”

⁷² Laak dagid mimalaw na puliˈ si Pedro, kaliˈ pektaluˈ, “Baa, bisan saak tug diwata, teluˈen ku diniui metuud, ki getaw kiin, ndiˈu mailala!”

⁷³ Naa benaˈ ndaˈ maiben, su nga getaw pemegindeg dia, miktaluˈ ilan pelum dini Pedro, “Naa yaˈa, minget dumaa lai nilan, puˈ mituˈusan ma nami dia pikebitan mu!”

⁷⁴ Dagid mingaduguˈ tanan si Pedro, laungen, “Apelii lai! Ndiˈu dema tuˈu mailalai getaw kiin!”

Iin demai keguni manuk. ⁷⁵ Milabuˈ dayun dig delendeman ni Pedro su tinaluˈ kiin ni Isus, laungen, “Dekag pasiˈ peguni su manuk, metelu deksuˈa na memalaw puˈ kanaˈ mau mailala.” Gumiwaˈ dayun dia si Pedro, lilugutan dayun mengaduy.