4 Choorweeyiichuuch, āmwoorwook man kilē maawar piich choo ting'ēy kaamuuka kupar pōōrwēyiikwook, aku māting'ēy kaamuuka nyoo tāku-irēy kir aka. 5 Kanya nyuun āmwoorwook :nyoo mārēy awar! Awara nyoo ting'ēy kaamuuka kuwiirchook ma nyēpō ākōy, paani koomēērō.

6 /Mākyooltēērēē tāriit muut rōōpiyō choo ng'ērin? Mpō tālēē nyoonēē, ku mēēlē ruutyēērēē :Iriin tariit aka tōkōl. 7 Nkēt mpō :Iriin puut choo mii mētpō chiich kilē tyaan. Āmoowāriisyō, āmu chāmook :Iriin kusiir tāriit chaa chaang'.”

8 Kitas taay :Yēēsu kumwoochi kiineetanichiich kilē, “Āmwoorwook kilē, chiich aka tōkōl nyoo mwoortoorēēnoon keey nkōō taayuu piich, āmwoortēērēē keey mpō chiichoonēē *Wēēroo Chiich nkōō taayuu *malaykeen chēpō Iriin. 9 Ku inyeentee nyoo tāyoon nkōō taayuu piich, kēētāyēy mpō nkōō taayuu *malaykeen chēpō Iriin.

10 Chiich aka tōkōl nyoo kang'alaala *Wēēroo Chiich nyaa ra, /kēēnyōōchinii kaat, wōloo nyuun inyeentee nyoo kang'alaala Toomirmiir nyoo Tiliil nyaa ra, ku /mākunyōōchinii kaat.”

11 Kuureer kumwoochi :Yēēsu kiineetanichiich kilē, “Nēē /kuumutaak /kēērwookwook nkōō kōōkwootin chēpō Yāwuutik ākōō chēpō pāytooyiik walak, ku maakany kuu-iimaak mēt :kiyoo āmwoorēy nyoo ātuukēē keey. 12 Kōōnook :Toomirmiir nyoo Tiliil ng'al choo āmwoorēy pērēētuunoonēē.”

13 Paani keewaang' :Yēēsu ng'aleechoochēē, kumwa :chiich nkōō kwēēnuu piich kilē, “Kiptaayaan, mwoochiiwoon kee wēēriinyoon kuchārwoon tukun choo kiimētwēēch paapēēnyoon.” 14 Kuwālchi :Yēēsu chiichoonēē kilē, “Choorweenyuun, chiich ng'oo nyi ki-iran ālēku kiirwookiintēēng'woong' ntā ku chāriintēēng'woong'?”

15 Kumwoochi :Yēēsu piich kilē, “Āriip keey! Makaraam āntuulchinii keey tukun chēpō ng'wēny. Āmwoorwook kilēē nyoonēē, āmu sopoon nyēpō man ku mēēlē kunyōōrchinii wōloo mii mōkōrnoonti nyoo ting'ēy :chiich.”

16 Kitas taay :Yēēsu kumwoochi piich kārkēēyin kilē, “Kiimii :chiich nyoo kiiting'ēy pareenyiin nyoo ōōw. Kiruryō par mu paraanoonēē nyēpō kwōng'uut. 17 Kuupkaat :chiichoonēē akuteepa keey kilē, ‘A-ir kilē nee kēny? Ākāsinii ānō pareechu tēēnō chu tōkōl?’ 18 Paani keepkaat kilēē nyoonēē, kumwa kilē, ‘Āmārēy a-ir kilēē nyi, āmārēy asyaar kaapchookēēnichu pō taay akaateek walak choo ēēchēēn. Kōōnoon :choochēē pārooyin wōloo ākāsinii pareechu tōkōl ākoosiintoochi tukuuchuuch tōkōl. 19 Nēē a-ir kilēē nyoonēē, ku āpkootēy kilē maaku-āmoon :piri pērēētuu aka, āmu koosiintō pareechuuch choo yāmoon a-am nkōō kēnyiis chaa chaang' choo pkoonēy. Maakumii :kiyoo toopkootēy. Kir nyoo kāng'ētu kipaat ku ātēpō ng'wēny ākoo-āmiisyō, ākoorēēsyō akaapaypayiitu.’ 20 Kimwoochi nyuun :Iriin chiichoonēē kilē, ‘Isālwō kilē nee kēny! /Ku-āpēēniin sopoontāng'uung' lang'atuuni. Pōyiituuy ng'oo nyuun :tukuuchoochēē kēēsiintoochi keey?’

21 Sālwō nyuun :chiich nyoo tuulchinii keey mōkōrnoonti nkōō kōōrooni amāting'ēy mōkōrnoontii kipsēnkwēt.”

22 Kumwoochi :Yēēsu kiineetanichiich kilē, “Āmwoorwook nyuun kilē, āmoo-iimchi keey āmiisyō, ntā ku sirōōy choo ālookēy. 23 Āmu ōōw :sopoon kusiir āmiisyō nkōō sirōōy. 24 Aroo kee tāriit! Māpālēy par amākāsēy, amāting'ēy mpō kaapchookō, aku pāyēy :Iriin. Akwaan pō koomānuut kitya kusiir tāriit! 25 Ng'oo nkōō akwaan :nyoo muukēy kutāsi keey pērēētuus chēpō sopēēnyiin nēē iimchi keey ng'alēēpō ng'wēny? 26 Ku nēē mēēmuukēy :koopkootuutēkwook kusārwook mpō kiitēēn oo, kupō nee kuu-iimaak :tukun walak mētēwēy.

27 Aroo kee taapuk wōloo piititooy, nku mā-irēy pāyit aka tōkōl nta kunāpchi keey mpō sirōōy, aku āmwoorwook nyuun man kilē mpō ntā kiiting'ēy :Sōlōmōōn mōkōrnoonti nyoo māting' /keemwa, ku kiimāting'ēy sirōōy choo kāroomēēn kilēē taapukeechu. 28 Ku nēē lookēy :Iriin keet chēpō kērti choo sopsōōt aniinee /ākēēwiirchi ma āsuun oo, kutēp nee wōloo looktooyook? Mining' kaaraneeng'woong' man.

29 Āmoo-iimchi keey āmiisyō ntā ku kiyoo ārēēy. Āmoo-iimchi keey mpō tukun tōkōl. 30 Piich choo mēēnkēt Iriin choo iimchinii keey tukuuchu pō ng'wēny, akuunkēt :Apoong'woong' kilē āmārēēkwaan tukuuchoochēē. 31 Kir nyoo ōōw ku awasa Pāyuunātēēnyiin, /tākēēkōōnook mpō tukuuchu.

32 Piichuuch, mpō toong'ērin :akwaan, ku moowāriisyō āmu paypay :Iriin kukōōnook pēēruur tōkōl nyoo chōōnchinii piich chēpō Pāyuunātēēnyiin. 33 Moorāti keey tukun choo āting'ēy, a-altee tukuuchoochēē tōkōl ākoosārunēē piich choo ting'ēy nyaril. Nēē a-ir kilēē nyoonēē, ānyōōru mōkōrnoonti nyoo mārookēy nkōō kipsēnkwēt. Moomii wōloonēē :chōōriin nyoo chōōrēy, āmoomii :kuutyaan nyoo luluukēy. 34 Wōloo mii :mōkōrnoontii chiich ku wōloonēē wōli tiirēē :mētinyiin.”

35 Kitas taay :Yēēsu kumwa kilē, “Āchēpō keey kukaraam ākoomētō taayitiisyēkwook kulārsōōt. 36 Akarkeeyiituu ākōō kipāyitiin choo mii kukānyēy mōkōryoonteeng'waang' kuwarakeera tuum. Paani ka-itu akuukōng'kōōng' kurkat, /kēēyooti kilē weel. 37 Pāypooyō kilē nee kipāyitiinēchoochēē nēē nyōōru mōkōryoonteeng'waang' kutoopēntooy akichēpootēēn. Āmwoorwook kilē irēy :mōkōryoontoonoonēē kipāyitiinēchoochēē kutēpi ng'wēny akupay :inyeentee.

38 Muukēy :mōkōryoon ku-itu saayit aka tōkōl. Muukēy ku-itu ooro kwēēn ntā kitoomō kuurir :kōōrēē. Aku nkōō saayit aka tōkōl nyoo ka-itu, kupāypāyō kipāyitiin choo kinyōōruuy ku chēpootēēn.

39 Akumārēy āsōwu kilē ntēēnkēt :chiich saayit nyoo chōōnēy :chōōriin katanyiin, tāmāpistooy /kēēput katanyiin. 40 Āchēpō keey nyuun āmu chōōnēy *:Wēēroo Chiich saayit nyoo moopkootinii.”

41 Kuteep :Pēētērō Yēēsu kilē, “Kiptaayaan, achaan ākityōōn chu imwoorwēēch kārkēēyini, ntā imwoochinii chiich aka tōkōl kuteer?”

42 Kuwālchi :Yēēsu kilē, “Kipāyityoon nyaa neen nyoo lēwēnēy :mōkōryoon kupayta katanyiin? Lēwēnēy nyaa ng'oroom /akeerānēy akuutē kuuryoontoochi kipāyitiin walak, si kuutē āmiisyō kilēē wōloo /kimārtooy. 43 Pēēruroot kipāyityoontoonoonēē nēē ir kilēē wōloo /kimārtooy paani ka-itu :mōkōryoonteenyiin. 44 Āmwoorwook man kilē tēnii :mōkōryoontoonoonēē kipāyityoonteenyiin kuuryoonchi tukuuchiich tōkōl.

45 Ki nēē pkaat nyuun :kipāyityoontoonoonēē kilē, ‘Kiisiista :mōkōryoonteenyuun’ akutoowu kulap kipāyitiināk chuuchō walak, aku-āmiisyō, akurēēsyō, akupōōkit, 46 ku chōōnēy nyuun :mōkōryoonteenyiin nkōō pērēētuu ākōō saayit nyoo mēēpkootinii :kipāyityoontoonoonēē kilē chōōnēy. Tēnii nyuun :mōkōryoontēē kipāyityoontoonoonēē siitēt, akuwiirchi wōloo mii :piich choo mātiirēē keey Iriin. 47 Kipāyityoon nyoo nkēt kiyoo mārēy :mōkōryoonteenyiin ku-ir, akumāmārēy ku-ir kilēē paani mārēy mōkōryoonteenyiin, kung'woonchinii nyēpō kwōng'uut. 48 Ku kipāyityoon nyoo mēēnkēt kiyoo mārēy mōkōryoonteenyiin ku-ir, aku-ir kir nyoo yāmēy kunyōōru ng'woonin nyoo ōōw, /kēētēnii ng'woonin nyoo mining'. Chiich nyoo /kākiitē pārooyin nyoo ōōw ku-ir kir, /kēēmārchinii ku-ir kir nyoo ōōw. Aku nēē kiitē chiich kaamuuka kusiir nyēpō aka, /kēēmārchinii ku-ir kir nyoo ōōw kusiir chiitō nyiinō aka.”

49 Kimwa :Yēēsu kuureer kilē, “Kyoochōōn āwiirchi ma kōōrooni. Lēyyē, lēē nee wōloo āmārtooy kilē ntā kaakular :mayi. 50 Āting'ēy nyaril nyoo āpuntoorēē nkōō pērēētuus choo pkoonēy, akimii kuu-iimoon :ng'aleechu ākōy pērēētuu nyoo rookēy.

51 Āpkootēy kilē koochōōn ā-āpu kaalya ng'wēny? Acha! Aku koo-āpu pēēsyoot. 52 Kung'eetee aniinee, kuchārēy keey :piich chēpō kaaw ākoong'o. Nēē kā muut :pichoochēē, kuchāmoon choo lēē :sōmōk kutayan choo lēē ārēēny. Ntā nēē ma nyoon, kuchāmoon choo lēē :ārēēny kutayan choo lēē :sōmōk. 53 Sāsēy :apoo wēēriinyiin, akusas :wēērii :apoonyiin. Sāsēy :eeyaan chēētanyiin, akusas :chēēto kaamee. Sāsēy :eeyeetaa poontee kwōōntaa wēēriinyiin, akusas :kwōōntaa wēērii eeyeetaa poonteenyiin.”

54 Kitas taay :Yēēsu kumwoochi piich kilē, “Nēē aroo pooltō kuchōōnō cheeronko, āmwoorēy kilē ‘Rōōpēnēy,’ akurōōpēn kilēē nyoonēē.^a 55 Ntā nēē chōōnō :yoomēt kamaspō taay, āmwoorēy kilē ‘Lārēy :asiis kwōng'uut,’ akular kilēē nyoonēē. 56 Ng'uurichu! Nku āmuukēy āsōwu wōloo lēkuuy kōōrēē paani kaaroo parak, kilē nee nyuun tāmoosōwu kilē lēē nee pērēētuus?

57 Āmu nee tamoonkēt :akwaan kir nyēpō man nyoo mārēy /kēē-irēy? 58 Nēē āmii āpēētii nkōō chiich nyoo mārēy kuurwookook, ātēērchiinō nkōō inyeentee kitoomō a-ita kaapkiirwook. Āmu nēē mee-ir kilēē nyoonēē, kuumutiniin :chiichoonēē kiirwookiin nyoo āpiin keepa /keeratin. 59 Āmwooruun nyuun kilē, mā ākōy keetyaayteen ākōy /keeraayta pēsēn aka tōkōl nyoo kirookiin.”