<<    <     Mataayo     13     >    >> 
Kārkēēyin nyēpō pāliin ākōō nyung'wēny
13
1 Nēē mii pērēētuunoonēē kuwēērō :Yēēsu kō akuwō kutēpō araaray pō Kalilaaya tapan kuunēētiisyō. 2 Paani keero :Yēēsu kilē kēēruruuchi keey piich chaa chaang' yoonēē, kulaang' mēēli akuunēētiisyō, kuuryoonchēērō piich tapan nyēpō araaray. 3 Kuuneet :Yēēsu pichoochēē ng'al chaa chaang' nkōō kārkēēyin. Kimwa kilē, “Kiing'eet :pāliintēē aka akuwō kipal pareenyiin. 4 Paani mii ku-isēē kāsur paree, kuchinchi :walak araa oor, kukwārchi keey :tāriit choochēē aku-am. 5 Kichinchi :kāsurēēk walak wōloo mii :korin yoo matyaan :nyung'wēny. Kupiityō :choochēē kilē weel āmu kii tāwārārō nyung'wēēk. 6 Aku kii nēē lar :asiis kupeel pareechoochēē, āmu kiimoomii wōloo chuutēy :iriinēkwaak, kuyoomō. 7 Kichinchi :walak wōloo mii :katōōy, kupiityō :katōōchoochēē aku-am pareek. 8 Kichinchi :kāsurēēk walak nyung'wēny choo kāroomēēn. Kupiityō :choochēē akunam par. Kiinam :walak par choo ēēchēēn, kunam :walak chēpō kwēēn, kunam :walak choo mēnkēēchēēn.” 9 Kumwoochi :Yēēsu pichoochēē kilē, “Chiich nyoo ting'ēy iit, kiteer.”
King'oong'chinii :Yēēsu kiineetanichiich kārkēēyin
10 Paani keewaang', kupa :kiineetanichiich akuteep kilē, “Āmu nee siing'āloolchiinēē piich kārkēēwuut?” 11 Kuwālchi :Yēēsu kilē, “/Kiikēēchāmwook āsōwu kiyoo ung'aat akipō :Pāyunātoo Iriin. /Mookuchāmchi piich walak. 12 Chiich nyoo pāyiisyēērēē kiyoo /kiikēētō /kēētāsinii walak, ku nyoo māpāyiisyēērēē, /kēēsārēē mpō nyoo ting'ēy. 13 Āmwoorunēē ng'al kārkēēyin āmu nēē ro, ku mēēnyitēy, ku nēē teer, ku māsōwuuy amātuupēy. 14 Kulēku nyuun man :ng'aleechu kiimwoorēy *:ōōrkooyoon *Isaaya kilē,
‘Ātēērtooy, āmoosōwuuy
ākoomārārtooy, āmoonyitēy.
15 Āmu kiiyoomō pichu :mētēwēy,
akumiinyiisyō :iitiin
akukāriisyō :koonyiikwaak,
ntā kāmālēē nyoonēē,
tākāmārātēērēē :koonyiikwaak,
akuteerteeree :iitiikwaak,
akuyootiisyō :mētēwēyiikwaak
akuwāliisyō kupka wōli āmii
asoop akwaaneek.’†
16 Aku akwaan pēēruurootēēn āmu mārārtooy :koonyiikwook akutēērtooy :iitiikwook. 17 Āmwoorwook man kilē chaang' *:ōōrkooy chēpō Iriin ākōō piich choo kii-ir man choo kiikany kuuro kiyoo āmii ārōōtēy, amaaro. Kukany kilē kiteer kiyoo ātēērēēkwaan, amaateer.”
Kiyoo ng'uutuuy :kārkēēyin nyēpō pāliin ākōō nyung'wēny
18 “Ateertee nyuun ākooyāpchi iit kiyoo ng'uutuuy :kārkēēyin nyēpō pāliintēē ākōō nyung'wēēk. 19 Chiich aka tōkōl nyoo tēērēy lōkōōy chēpō Pāyuunātoo Iriin amāsōwu kilē mwoorēy nee :lōkōōyichoochēē, ku karkeey ākōō aree oor nyoo kāchinchi kāsur. Tēērēy :chiichoonēē ng'al aku nēē chō *:Syeetaani kusara kiyoo kateer. 20 Paree yoo mii :korin, ku karkeey ākōō chiich nyoo tēērēy ng'ālyoon, akutaak kilē weel nkōō pāypooyō, 21 aku mānāmēy nyuun :chiichoonēē ng'ālyoontoonoonēē kukaraam, amātāsēy taay kuurānēy nyoo lōōw. Ku nēē chō :nyaril /akēēwus akipō kaaraneenyiin, kuuchuchuuka kilē weel. 22 Paree yoo mii :katōōy ku karkeey nkōō inyeentee nyoo tēērēy ng'ālyoon, wōloo nyuun kutoowu kuupkaat tukun chēpō ng'wēny akicham mōkōrnoonti. Kiichēy :tukuuchoochēē ng'ālyoontēē kuti mayi lokor. 23 Nyung'wēēk choo kāroomēēn ku karkeey ākōō chiich nyoo tēērēy ng'ālyoon akuukiilchi keey. Nāmēy aka par chaa chaang', kunam aka chēpō kwēēn, kunam aka choo ng'ērin.”
Kārkēēyin nyēpō chēēpēēnkēēn nkōō par
24 Kumwoochi :Yēēsu piich kārkēēyin akipō pāyuunātoo kaa Iriin kilē, “Kii-is :chiitō aka kāsur choo kāroomēēn mu pareenyiin. 25 Nēē mii lang'a paani mii :chiitōkōl rwoon, kuchō :puunyoon aku-isō kāsur chēpō chēēpēēnkēēn paraanoonēē pō nkaanu akuwēēchi keey. 26 Paani kāpiityō :nkaanuuk akunam par, kupiityō mpō chēēpēēnkēēn. 27 Kupka :kipāyitiin chēpō chiichoonēē pō paree akilē, ‘Mōkōryoontooni, mā kiitootee kāsur choo kāroomēēn paraani? Kapkaana ānō :chēēpēēnkēēnichu?’ 28 Kuwālu :chiichoonēē kilē, ‘Puunyoon :nyi kii-ir ng'aleechu.’ Kuteep :kipāyitiinēchoochēē kilē, ‘Ara kupa keerwalta chēēpēēnkēēnichoochēē?’ 29 Kuwālchi kilē, ‘Acha. Āmuukēy arwalta nkaanuuk ākōō chēēpēēnkēēnik paani āmii ārwāltooy chēēpēēnkēēn. 30 Akanya kupiityō tōkōl ākōy paani kayam /keekas si nēē ng'at āmwoochi pichu kāsēy kuurum chēēpēēnkēēnik akurat /sikeepeel. Aku nēē ityō kuurum nkaanuuk aku-āpu /pākēētō kaapchookeenyuun.’ ”
Kārkēēyin nyēpō kāsuryoontoo aritaali ākōō kimeera
31 Kitas taay :Yēēsu kumwoochi kārkēēyin aka akipō pāyuunātoo Iriin kilē, “Kiimar :chiich kāsuryoontoo *aritaali akuwō kitōōti pareenyiin. 32 Kāsuryoontooni ku mining' kusiir kāsur tōkōl, aku nyuun nēē kaakupiit, kulēkuuy keet nyoo ōōw kusiir keet tōkōl choo mii :par. Pkoonēy :tāriit akitēēchi kooriikwaak tāmoorichiich.”
33 Kuureer kumwoochi :Yēēsu kilē, “Karkeey :Pāyuunātoo Iriin nkōō ātoo kanam :cheepyooso *kimeera akuuwaar nkōō pusya chaa chaang' kuti kuukuutu.”
Kiineetee :Yēēsu piich kārkēēyin
Maarkō 4:33
34 Kiimwoochiinēē :Yēēsu piich choo keerum keey ng'al tōkōl kārkēēyin. Moomii :kir nyoo kiimwoorēy :Yēēsu kimamwaara kārkēēyin. 35 Kulēku man :ng'aleechu kimwoorēy *:ōōrkooyoon aka kilē,
“Āmwoochiinēē pichoochēē ng'al kārkēēyin,
āmwoochinii ng'al choo /kiikuwung' kung'eetee /kee-irta ng'wēny.”†
Kimwooruuy :Yēēsu kiyoo ng'uutuuy :kārkēēyin nyēpō chēēpēēnkēēn
36 Paani kaakumētō :Yēēsu pichoochēē, kuwō kō. Nyoo matyaan, kupkoonchi :kiineetanichiich akuteep kilē, “Mwoorwēēch kee kiyoo ng'uutuuy :kārkēēyinoonēē pō chēēpēēnkēēn mu par.” 37 Kuwālchi :Yēēsu kilē, “Chiichi kii-isēy kāsurēēchoochēē kāroomēēn ku *Wēēroo Chiich. 38 Par ku ng'wēny, kāsurēēchu kāroomēēn ku piich chēpō Pāyuunātoo Iriin. Chēēpēēnkēēn ku piich chēpō *Syeetaani. 39 Puunyoon nyoo tōōtēy chēēpēēnkēēnichoochēē ku *Syeetaani. Pērēētuu kaswa ku pērēētuuni pō lēt /kutilchinii piich ng'al. Piich choo kāsiisyēy ku *malaykeen. 40 Kārkēēyiituuy pērēētuunoonēē pō lēt nkōō yoo /kakung'ar chēēpēēnkēēn /akeepeel. 41 Yookuuy *:Wēēroo Chiich malaykeenichiich kupka kuurum piich tōkōl choo irēy piich walak ku-ir ng'ōōki ākōō kipng'ōōkiis tōkōl. 42 Wiirchinii pichoochēē ma nyoo māmēērēy wōloo pēētii kuriirsōōt akunyar keelat. 43 Chiich aka tōkōl nyēpō man nkōō taayuu Iriin /kēētōrōōrēy mu Kaa Paapa. Chiich nyoo ting'ēy iit, kiteer.”
Kārkēēyin nyēpō mōkōrnoontii pāyuunātoo Kaa Iriin
44 Kitas taay :Yēēsu kumwa kilē, “Karkeey :Pāyuunātoo Iriin ākōō mōkōrnoonti nyoo /kiiwung'aat mu par. Kunyōōru :chiich aka akuureer kuwung'chi paraanoonēē. Paani kaakuwung', kupaypayiit nyoo māting' /keemwa akuwō ku-alta tukuuchiich tōkōl siku-al paraanoonēē.”
45 Kuureer kumwa :Yēēsu kilē, “Karkeey :Pāyuunātoo Kaa Iriin ākōō nēē wāsēy :chiich sanay choo kāroomēēn. 46 Paani kānyōōru sanayaantee nyaa karaam kusiir tōkōl, kuwō ku-alta kir aka tōkōl nyoo ting'ēy siku-al sanayaantaanoonēē.”
Kārkēēyin nyēpō neet
47 Kuureer kumwa :Yēēsu kilē, “Karkeey :Pāyuunātoo Kaa Iriin nkōō yoo /kākiwiirchi neet araaray sikunam *koorookwō aka tōkōl. 48 Paani kaakunyir :kaaraakik neetit, /kēēchuut kuwō tapan akutēpi :pichoochēē ng'wēny kulēwēn kaaraakik choo kāroomēēn kuusiintō, akuwiirta chaa raacheen. 49 Lēkuuy nyoonēē nkōō pērēētuuni pō lēt mu ng'wēny. Pkoonēy *:malaykeen akutar piich chaa raacheen ākōō piich choo kāroomēēn, 50 akuwiirchi pichoochēē raacheen ma nyoo lārēy ākōy. Riirsōōt pichoochēē akunyar keelat.”
Tukun chēpō kēny ākōō choo reelacheen
51 Paani keewaang' :Yēēsu kumwoorēy ng'aleechoochēē, kuteep kiineetanichiich kilē, “Koosōwu ng'aleechu kēny?” Kuwalta :kiineetanik kilē, “Ēē, kaakēēsōwu.” 52 Kumwoochi nyuun :Yēēsu pichoochēē kilē, “Chiich aka tōkōl nyoo /kiikiineet ātēpuut chēpō Pāyuunātoo Kaa Iriin, ku karkeey nkōō chiich nyoo kang'usu tukun chaa reelacheen ākōō chēpō kēny mu kaapchookeenyiin.”
/Maakiikoonyit Yēēsu nkōō kōōrēēnyiin
Maarkō 6:1-6
53 Paani keewaang' :Yēēsu kumwoochinii piich kārkēwuutēchu, kuwēērō yoonēē, 54 kuwaraka Naasareet kōōrēēnyiin. Kuunēētiisyō mu sinakōōkiing'waang'. Kukwōng'yō :pichoochēē kiteer wōloo kiinēētitooy akuteep keey kilē, “Kiinyōōrchi ānō :chiichi ng'oroomnyooni? Nee ng'aleek chu pō kwōng'uut lēē chu? 55 Ma wēēroo kiitoong'iin nyi? Ma eeyeenyiin nyi /kikuurēē Maaryaa? Mā wēēchiikwaak :mpō Chēēmis, Chōōsēp, Siimnyōn ākōō Chuutaas? 56 Mā tiipiikwaak :chu mii yi ākōō achaan? Kunyōōrchi ānō :inyeentee ng'aleechu tōkōl?” 57 Kitay nyuun :pichoochēē ng'alēēpō Yēēsu.
Kumwoochi :Yēēsu pichoochēē kilē, “/Kiikoonyitēy *ōōrkooyoon nkōō wōltō aka tōkōl kung'ētu mu kōōrēēnyiin ākōō koong'waang' yoo /mākuukoonyitēē.”
58 Maa-ir :Yēēsu ng'al chaa chaang' chēpō kwōng'uut mu kōōroonoonēē āmu kiimaaran :pichoochēē inyeentee.