¹ Mendadi, minundas na tuˈu ditu Jerusalem si nga Isus. Benaˈ mesempel nailan dia, misebang ilan dig duaˈ maikaˈ lunsud piningalan dun Betpahe mukaˈ Betania, dia guksad nug Bentud nu nga Gayu Olibo, suminuguˈ si Isus dig duaˈ tawan sakupen. ² Laungen dinilan, “Bundas amu diag lunsud kia dia gunaan. Mendadi saˈ mateng amu ditu, duun dayuni maitaˈ niu petubuˈen nati asno iniketan, ndaˈ mainsan sekayay getaw. Naa kiin, ubaday niu, agak niu dayun dini naan. ³ Naa saˈ duuni sumaak diniu mauma ubadan niu, iini taluˈ niu diniin, ‘Duunig baalan dun nu Kaunutan, laak uliˈenen da ganam.’”

⁴ Naa saˈ maˈantu, mipanaw sug duaˈ tawan sinuguˈ ni Isus, mitaangan nilan tuˈu dia geksid karsadai nati asno, iniketan dig bisuangan balay. Inubadan nilan dayun. Benaˈ pegubadan nilan, ⁵ suminaak dinilan tuˈui nga getaw pegindeg dia, laung nilan, “Uy, taˈ maig baalen niu kiin? Mauma dema ubadan ma niui nati kiin?”

⁶ Simbag dayun nug duaˈ tawan sakup ni Isus su pimuunen dinilan. Miliag da dayun su nga getaw. ⁷ Mendadi, inagak nilan ditu ni Isus su nati asno. Benaˈ minateng ilan dia ni Isus, inigan nilan suub nilan sug lekud nug asno, suminakay dayun si Isus. ⁸ Mukaˈ melaun getaw mimelat suub nilan dia karsada mbianan ni Isus, basa nilan diniin. Sug duma pelum, minalap panga gayu daunan dia giuan, inikam nilan dadema diag biananen. ⁹ Mendadi su nga melaun getaw mpanaw di gunaan ni Isus, mesama di nga getaw peglendug dig binayaˈen, mimeksay ilan, laung nilan, “Pegbesaan kini! Melengas pepianan iin nu Megbebayaˈ ki minateng na pigwekilan nu Kaunutan Megbebayaˈ! ¹⁰ Kini su sumumpat tu keglekaunutan nu ginepuˈay ta si Adiˈ David! Melengas pepianan nu Megbebayaˈ ki Kaunutan kini! Pegbesaan dadema su Megbebayaˈ ditu gekbus langit!”

¹¹ Naa benaˈ minateng na tuˈu di Jerusalem si Isus, minundas ditu Pengedapan tu Megbebayaˈ. Piglingaylingayen dayun su kelaunanen dia. Naa benaˈ lelabung na gupia, minuliˈ pa si Isus ditug Betania, ilan nu nga sepuluˈ buˈ duaˈ tawan sakupen.

¹² Naa benaˈ miksala gendaw, mipuliˈ si nga Isus dia Jerusalem genat tug Betania. Saanan nilan dig dalan, migutem si Isus. ¹³ Kaliˈ megutem, duuni minitaˈen dia melayuˈlayuˈ sala puun gayu igera, melabung naig daunen. Linaawan dayun ni Isusi gayu kia, tekaw duun siaig bunganen. Laak kaliˈ pekpesempel dun, lumbus laak masiˈ daun kig igera kia, puˈ kanaˈ pa timpu memunga. ¹⁴ Miktaluˈ dayun si Isus tu gayu, laungen, “Genat nandaw, ndaˈidun naig bunga mu maˈaan nu getaw!”

Naa midengeg nu nga sakupen ki tinaluˈ kia ni Isus.

¹⁵ Benaˈ minateng ilan pelum tu Jerusalem, minangay puliˈ si Isus tu Pengedapan tu Megbebayaˈ. Mendadi benaˈ minateng dia, ki nga mendagang guliden mukaˈ su nga menaluy dia, pingutidanen. Pimbelikwangen pa pagid su ngag lemisaan nu nga membeles selapiˈ, sampay su nga gingkudan nu nga mendagang malepati, guliden tu Megbebayaˈ. ¹⁶ Mukaˈ ndaˈ iin peliag saˈ duuni getaw meguit pimetang, baalanen laak lektesan ki Pengedapan kia tu Megbebayaˈ. ¹⁷ Dayun mikpetuˈun si Isus tu nga getaw dia, laungen, “Misulat ditu Taluˈ nu Megbebayaˈ, ‘Ki Pengedapan dinaan, iini paingalan dun, balay penenebian nug launan bansa getaw.’ Dagid yamu kiin, binaal niu pegegludan ngag limbungan getaw ki Pengedapan kini.”

¹⁸ Mendadi ki nga kaunutan nug belian nu getaw Judea mukaˈ ki nga mekpetuˈun di Misulat Palinta nu Megbebayaˈ, midengeg nilan ki pinggulaula kia ni Isus. Sabaˈ midengeg nilan, mikpuun ilan dayun menengaw pebianan nilan mekpatay diniin. Mindek ilan diniin, kagina su kelaun getaw, mipatiˈ ilan mesebuˈay ditu tituluˈan ni Isus.

¹⁹ Naa benaˈ miglegebii pelum, migawaˈ na puliˈ si nga Isus dia Jerusalem.

²⁰ Naa benaˈ miksiselem, mibianan puliˈ ni nga Isus ki gayu igera kiin. Kaliˈ nilan maitaˈ, masiˈ milanes, minatay dadema su gangeten. ²¹ Naa si Pedro, milabuˈ dayun dig delendemanen su tinaluˈ ni Isus mekatag di gayu kia. Laung ni Pedro, “Apelai Sir, bentayay mu pa daan! Ki gayu igera kia piktuyudan mu, milanes na tuˈu!”

²² Kaliˈ pektaluˈ si Isus tu ngag dumanen, “Waˈa daan. Kaas yamu, salig amu dadema tu Megbebayaˈ. ²³ Puˈ taman taluˈu diniu, saˈ duuni mektaluˈ dig bentud kinuˈ, ‘Mainata, peksilabuˈa tug dagat,’ dayun kanaˈ megduaˈduaˈi kesalig nu mektaluˈ dun, puˈ petuudenen puˈ menuudi tinaluˈen kia, naa kiin, menuud dema tuˈu. ²⁴ Mendadi taluˈu diniu, pia alanduni penenebiin niu, pekpetuud amu dun puˈ malap niu, adun begay dadema diniu su pinengi niu. ²⁵ Mukaˈ saˈ megindeg amu menenabi, adin su taman dunig laatan ginaa niu dig duma niu, gelaˈ niu pedesunay. Puˈ saˈ maˈnia, su Gamaˈ niu ditu gekbus langit, mekpedasun dadema diniu di melaat penggulaula niu. [ ²⁶ Laak saˈ ndiˈ niu pedesunen su samataw niu, naa ndiˈ damu dema pedesunen nu Gamaˈ niu ditu gekbus langit di melaat penggulaula niu.]”

²⁷ Saˈ maˈnia, minateng na puliˈ si nga Isus dia Jerusalem. Benaˈ minateng ilan, mikpanawpanaw si Isus diag lenuˈan nu Pengedapan tu Megbebayaˈ. Mendadi ki nga kaunutan nug belian nu getaw Judea mukaˈ su nga mekpetuˈun di Misulat Palinta nu Megbebayaˈ kampuˈ nu ngag duma kaunutan nu getaw Judea, minadap ilan dini Isus. ²⁸ Sinaak nilan diniin, “Paa, ki pinggulaula mu kini, taˈ bai pegbayaˈ mu menggulaula dun? Taˈ taway dun bai migbegay diniˈa pegbayaˈ penggulaulaan mu?”

²⁹ Laung pelum ni Isus dinilan, “Naa, saakan ku amu deliˈ sektaang. Dayun saˈ mesembag na niu, pesuun ku dadema diniu su pigenatan nu pegbayaˈu penggulaulaan kui maˈnini kini. ³⁰ Iini sembag niu dinaan, si Juan kiin, adin genat su pegbayaˈen memunag tubig tu nga getaw? Genat tu Megbebayaˈ, saˈ genat ba laak di kilawan? Iini sembag niu.”

³¹ Naa saˈ maˈnia, migyagayaga dayuni nga kaunutan kia, laung nilan, “Naa, taˈ ma? Saˈ pinenggiˈ sembagen ta, ‘Su pegbayaˈ ni Juan, genat tu Megbebayaˈ,’ naa sumumpat dayun si Isus kini, ‘Saˈ maˈantu, mauma dema ndaˈ niu petuuday si Juan?’ ³² Saˈ sembagen ta pasiˈ, ‘Genat laak di kilawan,’ naa ndiˈ mesuˈat.” (Puˈ saˈ maˈniai sembag nilan, mendek ilan tu nga getaw, puˈ su kelaun getaw, mituudan ilan dun puˈ pimuunan nu Megbebayaˈ si Juan.) ³³ Kaas iin laaki mesembag nilan dini Isus, “Ndaˈ nami mesuunay.”

Laung dayun ni Isus dinilan, “Naa saˈ maˈantu, ndiˈu dadema pesuun diniu saˈ taˈi pigenatan nu pegbayaˈu penggulaulaan kui maˈnini kini.”