11 Āpēēruuroot :akwaan nēē muulook :piich, akuunyariilaak, akuutoomchook ng'al chaa raacheen choo mā pō man akipō aneen. 12 Nēē ku-irwaak kilēē nyoonēē, āpāypāyiitu ākoong'ārākyō āmu mii :mālāk nyoo ōōw nyoo kiikuusiintoowook :Iriin mu kipsēnkwēt. /Kiikuunyariil mpō *ōōrkooy chēpō Iriin chēpō kēny kilēē nyoonēē.”

13 Kitas taay :Yēēsu kumwoochi kiineetanichiich kilē, “Akwaan muuny chēpō ng'wēny. Nēē kaakutārtāriituuy muunya, kēē-irtooy nee sikukārāmiituuy? Pēsyēēt, /ku-istooy kipaat /akeetyakaatyak.

14 Akwaan lēpooyin nyēpō ng'wēny. Māwung'ēē kōōrō nyoo /kiikutēēchi tul. 15 Āmoomii :chiich nyoo noomēy taayit akukara tēr. /Kiinoomēy taayit /ākēētē yoo tōrōōr sikuulēpooyiit koot. 16 Mārēy nyuun āng'uutii piich lēpooyin, si nēē ng'at kuuro :piich pāyiisyōōnikwook choo kāroomēēn, akuuloosu Apoong'woong' nyoo mii kipsēnkwēt.”

17 “Ameepkaat :chiich kilē kyoochōōn apoot ng'alēēpō *Muusa ākōō chēpō *ōōrkooy, aku nyuun kyoochōōn asilta ng'aleechoochēē. 18 Āmwoorwook man kilē muukēy kusiirtō :im ākōō ng'wēny, aku nyuun moomii :kir nyoo pētēy mu siruutēchu, ākōy ku-iriisyō tōkōl. 19 Kunyuun oo, chiich nyoo kāsiiru ng'aleechoochēē, mpō nyoo mining' nyaa tyaan, akuuneet piich walak ku-ir kilēē inyeentee, /kēēmining'iitēy chiichoonēē mu Pāyuunātoo Kaa Iriin. Ku chiich aka tōkōl nyoo katuup ng'aleechoochēē akuuneet piich walak, /kēētōrōōrēy mu Pāyuunātoo Kaa Iriin. 20 Āmwoorwook man kilē nēē maaran Iriin kukaraam kusiir wōloo rāntooy *Parisaay ākōō koonēēt chēpō ng'ātuut, ku mā ākōy achuut Pāyuunātoo Kaa Iriin.”

21 Kitas taay :Yēēsu kumwa kilē, “Ānkēt :akwaan kilē /kiikumwoochi piich chēpō kēny kilē ‘Moorumiisyō. Aku chiich aka tōkōl nyoo kārumiisyō, kumārēy /kēērwoochi nkōō kōōk /sikēētilchi kiirwook.’^† 22 Ākoomwoorwook man kilē chiich aka tōkōl nyoo kānārēēchi chiich aka kilēēn, /kēērwoochinii. Ku chiich aka tōkōl nyoo kālēēchi aka ‘Mā nyi’ /kēērwoochinii; ku nyoo mwoorēy kilē, ‘Inyēēn sālwō,’ /keepa /kēēwiirchinii ma nyēpō ākōy.

23 Ku nēē mārēy i-irchi Iriin kōrōs akiipkaat kilē ting'ēēniin :chiitō aka ng'ālyoon, 24 imēti tukuuchoochēē taayuu kaapkōrōs akiiwō ākōy wōloo mii :chiichoonēē akaapa āchoomnyō kupōk si nēē ng'at, iwee-ir kōrōsēēchoochēē. 25 Nēē mii :chiich nyoo mārēy kuurwookin, isip itēērchiinō ākōō inyeentee kutoomō apee kōōkwō. Āmu nēē mee-ir kilēē nyoonēē, kuumutiniin :chiichoonēē kiirwookiin nyoo āpiin /keepa /keeratin. 26 Āmwooruun man kilē, mā ākōy keetyaayteen ākōy /keeraakta pēsēn aka tōkōl nyoo kirookiin.”

27 Kitas taay :Yēēsu kumwoochi pichoochēē kilē, “Ānkēt :akwaan kilē /kiikumwoochi piich chēpō kēny kilē, ‘Ākoonyit chēēpyōōsōōkwook amoosiir karwa.’^† 28 Āmwoorwook man kilē chiich aka tōkōl nyoo keero cheepyooso aku-āmchi ng'at koong', ku maakoonyit cheepyooseenyiin. 29 Nee irin :koontong'uung' nyēpō taay ipēt, ipālu akiiwiirta. Kaykay ipoot kamas ākoong'o nyēpō pōōrtāng'uung' kisiir /kēēwiirchi pōōrtāng'uung' tōkōl ma nyēpō ākōy. 30 Ku nēē irin :ēēruung'uung' nyēpō taay ipēt, itilta akiiwiirta. Kaykay ipoot kamas ākoong'o nyēpō pōōrtāng'uung' kisiir /kēēwiirchi pōōrtāng'uung' tōkōl ma nyēpō ākōy.”

31 Kuureer kimwa :Yēēsu kilē, “Ānkēt mpō kilē mwaaraat kilē, ‘Chiich aka tōkōl nyoo keetyaak cheepyooseenyiin ku mārēy kisirchi cheepyoosoonoonēē kir nyoo ng'utuuy kilē kaakuutyaak keey.’ 32 Āmwoorwook nyuun kilē, chiich aka tōkōl nyoo keetyaak cheepyooseenyiin nyoo maasiir karwa, ku ka-ir cheepyoosoonoonēē kisiir karwa nēē āp :chiich, ku chiich aka tōkōl nyoo āpēy cheepyooso nyoo /kakuutyaak, ku kāsiir :chiichoonēē karwa.”

33 Kuureer kumwa :Yēēsu kilē, “Ānkēt :akwaan kilē /kiikumwoochi piich chēpō kēny kilē, ‘Nēē āyoomiis chiich kir nkōō kaarinaa Iriin, a-ir kilēē paani koosirpēn nkōō kaarinaa Iriin.’ 34 Āmwoorwook kilē āmoosirpēnēē kir aka tōkōl nēē yoomiisēy chiich kir. Āmēēsirpēnēē :chiich kipsēnkwēt, āmu pāytooyiisyēy :Iriin mu kipsēnkwēt. 35 Āmēēsirpēnēē :chiich ng'wēny, āmu muung'ēē kēēlyeechiich wōloonēē. Āmēēsirpēnēē :chiich mpō Chēērusālēēm āmu kōōroo Iriin Pāytooyiin nyoo ōōw. 36 Āmēēsirpēnēē mpō mēting'uung', āmu mēēmuukēy i-ir puutyoon mpō ākoong'o kurēēliit ntā kutuuriit nkōō mēting'uung'. 37 Nee ran kir aka tōkōl, ku kaykay imwaa kilē ‘Ēē, lēē nyoonēē.’ Ntā nēē tay, imwaa kilē ‘Acha, mālēē nyoonēē.’ Ng'ālyoon aka tōkōl nyoo keemwaa nyoo siirēy chu, kuchōōnēē :nyoonēē wōloo mii :inyeentee nyaa ra.”

38 Kitas taay :Yēēsu kumwa kilē, “Ānkēt :akwaan kilē /kiikuuneetaak kilē, ‘Koong' nkōō koong', keelat nkōō keelat.’^† 39 Aku āmwoorwook :aneen nyuun kilē, nēē rapaakin :chiich mataany kamaspō taay, kimēē-ooyta, iwārāchi mpō kamaspō lēt kuurapaak. 40 Ki nēē rwookin chiich akipō sireeng'uung' nyēpō wōlipoor, ikany ku-āp mpō nyēpō saang'. 41 Nēē irin :āskāriin ikalap tukuuchiich saayit ākoong'o, ireer itāsi ikalap saayit aka. 42 Tēē chiich aka tōkōl nyoo kāsoomin. Nēē mārēy :chiich kuupēsēēnin kir, ipēsēēnchi.”

43 Kitas taay :Yēēsu kumwoochi kilē, “Kyaateer :akwaan /kēēmwoorēy kilē, ‘Chama chiipō kōōkwēēng'uung' akiisas puunikuuk!’ ^† 44 Āmwoorwook nyuun kilē achama puunikwook ākoosoochinii choo usook 45 saakarkeeyiituu ākōō Paapēēng'woong' nyoo mii kipsēnkwēt nyoo irēy asiis kupuusu akuulēpoochi piich choo kāroomēēn ākōō chaa raacheen aku-ir mpō roop kurōōpēnchi piich choo irēy tukun choo kāroomēēn ākōō choo irēy tukun chaa raacheen. 46 Nēē āchāmēēkwaan kipaat piich choo chāmook oo, ku mālāk nee nyoo ānyōōruuy? Nku irēy mpō :kipng'ōōkiin kilēē nyoonēē. 47 Ku nēē āng'āloolchi choorwayiikwook kipaat oo, ku kaa-ir :akwaan nee nyoo ng'ulēy? Nku irēy :mpō piich choo mēēnkēt Iriin kilēē nyoonēē. 48 Ku nyuun oo, karaam a-ir tukun choo chuulootēēn kilēē Paapēēng'woong' nyoo mii kipsēnkwēt nyaa chuulaat.”