Tukun choo iriisōōt mu pērēētuus chēpō lēt
13
1 Kumii :Yēēsu ākōō kiineetanichiich kupēērēē piriiruu *Kōpō Iriin, kumwoochi :kiineetanee aka kilē, “Koonēētiin, kāroomō koriichu ākōō kooriichu kilē nee kēny!” 2 Kumwoochi :Yēēsu kilē, “Keeroo kooriichu ēēchēēn chu? /Kumilēy nyoo moomii :kor mpō ākoong'o nyoo ng'ētuunēē parakuu aka.”3 Paani mii :Yēēsu kutēpēē ng'wēny nkōō Tulwoo *Musēytuun nyoo kiirōōtēy keey nkōō *Kōpō Iriin, kuteepee :Pēētērō, ākōō Chēēmis, ākōō Chowaana ākōō Antereeya kilē, 4 “Mwoorwēēch, iriisōōt :ng'aleechu āyu, aku kir nee nyoo ng'uutwēēch kilē kaakuriiku pērēētuusyēk choo iriisōōt :ng'aleechu?”
5 Kumwoochi :Yēēsu akwaaneek kilē, “Āriip keey! Maakany kuumēlmēēlook :chiich. 6 Chaang' choo pkoonēy nkōō kaarineenyuun, akumwoorēy kilē, ‘Aneen *Meesaaya’ akuupootēy piich chaa chaang'.
7 Aku nēē ateer akipō pooryoot nyoo lēēkit ākōō nyoo lōōw, ku moowāriisyō āmu ākōy ku-iriisyō :tukuuchoochēē, wōloo nyuun toomō ku-itēy lēt nyēpō ng'wēny. 8 Poorsōōt :pōrōr ākōō pōrōryēē aka, kupooryō :kōōrēē aka ākōō aka. Chōōnēy :kiprang'rang' kāmostiin chaa chaang', akuchō :kēmēy. Ng'woonin nyēpō taay :nyoonēē akimii nyuun ng'woonin nyoo ōōw nyoo tākuchōōnēy.
9 Āriip keey nyuun āmu mii :piich choo nāmook akuumutaak /pākēērwookwook akuunōōrook mu sinakōōkiin. /Kunāmook /ākēē-āpook taayuu kāāntōōy ākōō pāytooy akipō aneen. Pārooyin :nyoonēē nyoo āmwoochinēē pichoochēē lōkōōy choo kāroomēēn. 10 /Ākēē-āmtooy kipōk lōkōōy choo kāroomēēn nkōō kōōrēē tōkōl sikuchō :pērēētuu nyēpō lēt.
11 Nēē /kunamaak, /akēē-āpook /kēērwookwook, ku moosip a-iim keey kilē āmwoortooy nee. Paani ka-itu pērēētuu, amwaarta kiyoo /kukōōnook. Āmu kiyoo āmwoortooy, ku mēēlē :akwaan chu āng'āloolēy, aku Toomirmiir nyoo Tiliil.
12 Āltooy :chiich wēēriing'waang' /keekeet. Ku-alta :āpoo laakweenyiin, pooryēērēē :laakook sikiikwaak kuukeet. 13 Sāsook :piich tōkōl akipō aneen. Aku nyuun chiich nyoo murtooy ākōy pērēētuu nyēpō lēt /kēēsāruuy.”
Wōloo /kung'āmtooy Chēērusālēēm
14 Kitas taay :Yēēsu kimwa kilē, “Nēē aroo ‘kir nyēpō ng'amat’† kuuryoong'ō yoo /mākumārchinii kumii, (iyāp iit :chiich nyoo isōōmānēy ng'aleechu) ku kaykay kumwēr :piich choo mii Chuuteeya ākōy lakamōōs. 15 Nēē nyōōrchi :ng'aleechu chiich kimii kō parak, ku marēku kuchuut kō kimar kir aka tōkōl siku-āp. 16 Ku chiich nyoo mii pareenyiin kimawaraka kaaw kuwō kimar sireenyiin. 17 Kōrōōmituuy pērēētuusyēchoochēē nkōō chēēpyōōsōōy choo ting'ēy tuum ākōō choo rēērinii laakōōy! 18 Asaa Iriin tāmā-iriisyō :ng'aleechu pērēētuu kārtitin. 19 Ōōwiituuy :nyaril nyēpō pērēētuusyēchoochēē kusiir nyaril aka tōkōl nyoo kiikuchō kung'eetee ku-ir :Iriin ng'wēny. Āmoomii ātoo tākuchōōnēy :nyaril aka nyoo lēē nyoonēē pērēētuu aka. 20 Aku nyuun oo, kiikuunwaakiit :Iriin pērēētuusyēchoochēē. Ntā kiimaanwaakiit :Iriin pērēētuusyēchoochēē, ntā moomii :chiich nyoo kusāruuy. Āmu mii :piichiich choo kiikulēwēn, ku kiikuunwaakiit pērēētuusyēchoochēē.
Āriip keey /mākuuchuunnyook
21 Aku nēē mwoorwook :chiich aka tōkōl kilē, ‘Roo kee, ānyi *Meesaaya!’ ntā kilē, ‘Roo kee, ānyiinō!,’ ku moorānchi. 22 Pkoonēy :piich choo lēē ng'uur choo irtooy keey *Kiriistō ntā ku *ōōrkooy chēpō Iriin. Irēy :pichu ng'al chēpō kwōng'uut sikuuchuunnyō nēē muukēē piich chēpō *Kiriistō choo lēwēnootēēn. 23 Kunyuun oo, āriip keey! Koosip āmwoorwook tukun tōkōl kitoomō ku-itu pērēētuu.”
Tukun choo ng'uutuuy paani wārākēē :Yēēsu
24 Kitas taay :Yēēsu kumwa kilē, “Nēē woonyō :nyāriluutēchu nkōō pērēētuusyēchoochēē kuumiisēē :asiis amaakulārēy araawa. 25 Chunuuy :kookeel nkōō parak, /ākēētimtiimēy tukun tōkōl choo mii parak. †
26 Nkōō yoonēē, /kēērōōtēy *Wēēroo Chiich kuchōōnēy nkōō pool mu kaamuuka ākōō kiimnān nyoo ōōw nyēpō Iriin. 27 Aku nēē ng'at kuuyooytō :Iriin malaykeenichiich kupa komooswook tōkōl chēpō ng'wēny pākuurum piichiich tōkōl choo kiikulēwēn :inyeentee.”
Pērēētuu nyoo wārākēē :Yēēsu
28 Kitas taay :Yēēsu kumwochi kilē, “Akanya kuuneetaak *mookāng'wō ng'ālyoon. Nēē aroo tāmoorichiich kānyāriliituuy akutoowu kupiityō :sāk, āsōwu kilē kaakuriiku kuwasees :kōōrēē. 29 Ku lēē nyoonēē mpō, nēē aroo ku-iriisōōt :tukuuchoochēē, āsōwu kilē kaakuriiku :pērēētuu nyoo wārākēē *Wēēroo Chiich.
30 Āmwoorwook man kilē mārookēy :piichuuch mpō ntā iriisyō ng'aleechu tōkōl. 31 Rookēy :parak ākōō ng'wēny, aku mēēlē nyuun rookēy :ng'ālyoontēēnyuun.
32 Moomii :chiich nyoo nkēt pērēētuu ntā ku saayit nyoo chōōnēy *:Wēēroo Chiich. Mēēnkēt *:malaykeen, āmēēnkēt mpō :Wēērii. Iriin ākityōōn nyoo nkēt.
Āchēpō keey
33 Āriip keey, āmu moonkēt ātoo ituuy :pērēētuunoonēē.
34 Karkeey nkōō chiich nyoo kāwō ruutoor. Kumēti kipāyitiinēchiich pāyit nyoo irēy akumwoochi aka kuriipsyō nkōō kurkat. 35 Āriip keey nyuun āmu moonkēt paani chōōnēy :chiitaa kata. Muukēy ku-itu kosoliny, lang'a kwēēn, ntā kutoomō kuurir :kōōrēē, ntā paani kaakupuusu :asiis. 36 Nēē chō kumoonkēt, ku kaykay kumānyōōrwook kooruuyō. 37 Kunyuun, ng'aleechu āmii āmwoorwook, ku āmii āmwoochinii piich tōkōl: Āriip keey.”