Yēēsu ākōō Sakaayo
19
1 Paani kiichuut :Yēēsu nkanasaa Chēērikō, kimii kitiltooy, 2 ku kiimii :chiich aka yoonēē nyoo /kiikikuurēē Sakaayo. Kii ākoong'o nkōō piich choo kii kwārēy *kōōti. Kii inyeentee nyi ōōw aku kii mōkōryoon. 3 Kiimārēy :chiichoonēē kuuro kilē Yēēsu ku ng'oo. Maamuuk kuuro āmu kii nwaak inyeentee aku kii chaang' :piich yoonēē. 4 Paani keero :Sakaayo kilēē nyoonēē, kuurip taay akuwō kulaang' *mookāng'wō sikuurō Yēēsu ku karaam āmu kiimii :Yēēsu kuwēētii araanoonēē. 5 Kii nēē it :Yēēsu yoonēē, kuuro im akilēēchi Sakaayo, “Sakaayo, rēku kilē weel, āmu āmāraa ālēku toontēēng'uung' aniinee.” 6 Kurēku :Sakaayo kilē weel akuwō nkōō Yēēsu ākōy katanyiin akuwō kutaak Yēēsu nkōō pāypooyō. 7 Maapāypāchi :piich walak ng'aleechoochēē. Kiing'unyng'uuny :pichoochēē kumwoorēy kilē, “Āmu nee sikuruutoochi :Yēēsu chiich nyoo kiiku-ir kilēē nyi?”8 Nēē mii lētuun, kuuryoong' :Sakaayo akumwa kilē, “Kiptaayaan, āchārēy tukuuchuuch kwēēn ākootō mēēy. Aku nēē mii :chiich nyoo kyoopēē tukuuchiich chaa chaang' kusiir chu /kiikumārēy paani kyookwārootēy *kōōti, āroochinii āsip ang'wan.” 9 Kumwa :Yēēsu kilē, “/Kaakēēsāru aniinee kōyi, āmu kātiirō keey :chiichi Iriin kilēē paani kiitiirēē keey :Apraam. 10 Kiichō *Wēēroo Chiich, kuwas akusāru piich choo kiikupētyō.”
Pāyiisyēērēē kukaraam kir nyoo /kākukōōnin
11 Paani kiimii :piich chaa chaang' kutēērēy kiyoo kiimii kumwoorēy :Yēēsu, kitas taay :Yēēsu kumwoochi pichoochēē kārkēēyin. Āmu kiilēēkit ku-it :Yēēsu Chēērusālēēm, ku kiipkootēy pichoochēē kilē mārēy siku-itu :Pāyuunātoo Iriin. 12 Kimwoochi :Yēēsu pichoochēē kilē, “Kiimii :chiich nyoo koonyitoot nyoo kiiwō kōōrēē aka nyoo lōōw pākēēloochi kilēku pāytooyiin sikuchō kupayta kōōrēēnyiin.
13 Kutoomō kuwō, kukuur kipāyitiinēchiich choo lēē taman akuutē chiich aka tōkōl rōōpiyō choo tēēniityō. Kimwoochi chiich aka tōkōl kilē, ‘Pāyiisyēērēē rōōpiyēēchu i-alee tukun akii-āltooy ākōy paani kaawaraka.’ 14 Kumaakicham nyuun :piichiich inyeentee. Kuuyooytō :piichiich piich walak kipa kumwaarta kilē, ‘Mākumārēy chiichi kilēku pāytooyiintēēnyoon.’
15 /Kēēpākēēloochi chiichoonēē kilēku pāytooyiin akuwaraka. Paani ka-itu, kukuur kipāyitiinēchiich choo kii lēē taman chu kiitēnii rōōpiyō siku-ala tukun aku-āltooy kuchō kumwooru :chiich aka tōkōl kir nyoo kiikunyōōru. 16 Paani ka-itu :pichoochēē, kumwa :nyēpō taay kilē, ‘Mōkōryoontooni, kyoonyōōru āsip taman chēpō chu kiikōōnoon.’ 17 Kilēēchi :pāytooyiintoonoonēē, ‘Inyēēn kipāyityoon nyaa karaam. Kunyuun, āmu kiipāyiisyēērēē tukuuchoochēē ng'ērin choo kyookōōniin kukaraam, kiyoo ākōōniin ku nyi: ipāytooy kōōrootin taman.’
18 Kumwa :nyēpō ārēēny kilē, ‘Mōkōryoontooni, kyoonyōōru āsip muut chēpō chu kiikōōnoon.’ 19 /Kēēmwoochi nyoonēē kilē, ‘Ipāytooy kōōrootin muut.’
20 Kuchō :kipāyityoontēē aka akilē, ‘Mōkōryoontooni, āchu rōōpiyēēkuuk. Kyaawaawung' :aneen, moomii :kir nyoo kyaa-iree. 21 Kyaawariin, āmu ikōrōōm, ākiichāmēy i-āpēy tukun choo maasiintō, akiikāsēy par choo kiimeetoot.’ 22 Kilēēchi :pāytooyiintee, ‘Kipāyityoontooni ra, pāriin :ng'alēēkuuk. Kookiinkēt :inyēēn kilē ākōrōōm :aneen akukyaacham :aneen ā-āpēy tukun choo maasiintō akaakas par choo maatoot. 23 Kwaamin :nee simēētō rōōpiyeechuuch wōloo /kiisiintoochinii rōōpiyō sikupas keey? Ntā kii-ir :inyēēn kilēē nyoonēē, ntā kyoochōōnēy ānyōōruuy rōōpiyēēchuuch kiikutāsiisyō.’
24 Kumwoochi :pāytooyiintoonoonēē piich choo kiiryoonchēērēē yoonēē kilē, ‘Amaree rōōpiyēēk chu ting'ēy ākootō chiichi ting'ēy āsip taman chu /kiikuutō.’ 25 Kimwa :pichoochēē kilē, ‘Mōkōryoontooni, nku ting'ēy :nyoonēē āsip taman, pō nee /kēētāsi walak?’ 26 Kumwoochi :pāytooyiintoonoonēē pichoochēē kilē, ‘Āmwoorwook man kilē chiich nyoo pāyiisyēērēē kiyoo /kiikēētō, /kēētāsinii walak. Ku chiich nyoo māpāyiisyēērēē, /kēēsārēē mpō nyoo ting'ēy. 27 Akipō nyuun :puunichuuch choo kāmāmāroon ālēku pāytooyiinteeng'waang', amutuu yi akaakeet nkōō taayuunyuun.’ ”
/Kēētookēy Yēēsu nkōō Chēērusālēēm kilēē pāytooyiin
28 Paani keewaang' :Yēēsu kumwoorēy ng'ālēēchoochēē, kitas taay kuutang' wōli pō Chēērusālēēm ākōō kiineetanichiich.
29 Paani kāriichi Peetpaake nkōō Peetannya yoo lēēkitēē tul nyoo /kikuurēē *Musēytuun, kuuyooytō kiineetanichiich ārēēny, 30 akilēēchi, “Apee ākōy kēēstoonichu ātoopēnēy. Āmii āchuutēy, ānyōōruuy moorpō sikiryō kurataat akutoomō kukasan chiich pērēētuu aka. Atyaak sikiryoonoonēē ākoorēēwu. 31 Nēē teepeenaak :chiich kilē, ‘Āmu nee saatyaaka?’ āmwoochi kilē, ‘Mārēy Kiptaayaan.’ ”
32 Kiipa :kiineetanichoochēē kunyōōru sikiryoonoonēē kilēē paani kiimwoochinii :Yēēsu. 33 Paani mii kuutyookēy moortaa sikiryō, kuteep :piikaa sikiryēē kilē, “Ātyoochinii nee sikiryoonoonēē?” 34 Kuwālchi kilē, “Mārēy :Kiptaayaan.” 35 Kuurēētō sikiryoonoonēē ākōy yi kiimii :Yēēsu, akuukārkoorchi sirooy pataruu sikiryēē, kukālāpchi :kiineetanik Yēēsu sikiryēē.
36 Kii nēē mii :Yēēsu kuwēērēē sikiryēē, kuukārkoorchi :piich sirōōkwaak aree. 37 Paani ka-itu yoo kārēytō aree nkōō Tulwoo *Musēytuun, kutoowu :tuupiipō Yēēsu kuuloosu Iriin nkōō pāypooyō. Kiituumootēy :tōkōl kimii kupēētii. Kiiloosuuy Iriin akipō tukun chēpō kwōng'uut choo kiiro. 38 Kiimwoorēy :pichoochēē kilē,
“Pēēruuroot :Pāytooyiin nyoo chōōnēy nkōō kaarinaa Iriin.
Chōōnēē :kaalya kipsēnkwēt.
Akutōrōōr :Iriin.”
39 Kimwoochi *:Parisaayiik walak choo kiimii yoonēē Yēēsu kilē, “Koonēētiin, pkoong'ō tuupiikuuk kusiisyō matakumwa ng'aleechu.” 40 Kuwālchi :Yēēsu Parisaayiichoochēē kilē, “Āmwoorwook man kilē nēē siisyō :pichu mēēlooswoon, kutoowuuy :korin kuulooswoon.”
Kiriirēē :Yēēsu piich chēpō Chēērusālēēm
41 Kii nēē riik :Yēēsu Chēērusālēēm, kuuro akuriira piich chēpō Chēērusālēēm akuraanta :lōōk 42 kimwoorēy kilē, “Ntoonkēt aniinee kir nyoo maraat a-ir soonyōōru kaalya. Nku āmii aniin tuurin. 43 Mii :pērēētuu nyoo sēētinook :puunikwook akuteek karwa kuuwaantiriir kōōrēēng'woong' akuparaak. Kwēēnkwēēnook nyoo moomii wōloo āchiriltooy. 44 Ng'āmēy kōōrēēng'woong' kurook nyoo moomii kō mpō ākoong'o nyoo ng'ātuuy kuuryoong'ēy. Akuparaak nkōō laakōōkwook kilē chiim. Iriisōōt tukuuchu āmu moosōwu :ākwoonēēk kilē kiichō :Iriin inyeentee kusārwook.”
Kuutiliilēy :Yēēsu Kōpō Iriin
Mataayo 21:12-17; Maarkō 11:15-19
45 Kuchuut :Yēēsu piriiruu *Kōpō Iriin akutoowu ku-oon piich choo kyooltooy tukuukwaak. 46 Kumwoochi pichoochēē kilē, “Siraat kilē, ‘/Kukuurēē koonyuun kōpō saayeet,’† nku kyaa-ir :akwaan kilēku ‘Kēpēnoo chōōr.’† ”