Pampetudungia
i Suro Yohane
Pepongkaa lolita
Ihi sura ide iami kana i apa au napatongawa Yesu Kerisitu i Yohane. Nguru-nguruna, Yohane moita Yesu nodo Ana Manusia au molumao i olo pitu mbuana biti hulo (1:12-18). Naita wori nodo Tadulako au mesawi i dara bula (19:11-16). Hai naita nodo Ana Dimba au meangka i hola kadera kadatuana Pue Ala i suruga (5:6-14; 21:22-23; 22:1-5).
Sura ide nauki Yohane i temponda to Sarani rapopeahi-ahi anti pepoinalainda i Yesu. I tempo iti, ope-ope tauna i kadatua Roma rapari-parihe menomba i Datu Roma au rauli Kaisar. Arahe to Sarani au rapapate anti pepoinalainda, lawi barahe mau menomba i Kaisar. Ara worihe au mousuli hangko i pepoinalainda lawi langahe. Mewali, ihi sura ide mopakaroho lalunda to Sarani bona ineehe mousuli hangko i pepoinalainda i Yesu.
Ihi sura ide rapahawe i lalu bahangkia pakana pampetudungia. Ara ngkora pandiri au rapake i lalu sura ide au bara mani manoto lempona irikita. Agaiana nauri nodo, patoa paturo i sura ide manoto: i lalu dunia ide, to Sarani ina rapopeahi-ahi, agaiana ineeke mousuli hangko i pepoinalainta, lawi i kahopoana, Pue Yesu ina monangi ope-ope au mampoiwali Pue Ala, hai Ia ina moparenta hawe i hae-haena (11:15). Hai ikita au meula Iria, ina moparenta worike hihimbela hai Ia.
Ihi sura
1. Pepongkana sura (1:1-8)
2. Pampetudungia au nguru-nguruna (1:9–3:22)
a. Yesu raita nodo Ana Manusia au molumao i olo pitu mbuana biti hulo (1:9-20)
b. Paturo i to Sarani au arahe i pitu jumaa (2:1–3:22)
3. Pampetudungia au kadua (4:1–16:21)
a. Yesu raita nodo Ana Dimba au meangka i hola kadera kadatuana Pue Ala i suruga (4:1–5:14)
b. Ana Dimba mobungkahi pene au pitu mbuana (6:1–8:5)
c. Tatamburu au pitu mbuana ratawue (8:6–11:19)
d. Pitu tanda au mopatongawa apa au ina mewali i alo au ina mai (12:1–16:21)
4. Pampetudungia au katalu (17:1–21:8)
a. Yohane moita hadua towawine au kadake ntepuu babehiana, au rahanga Babeli (17:1–19:10)
b. Yesu raita nodo Topodara au lao mombeala (19:11–21:8)
5. Pampetudungia au kaiba: Yohane moita Ana Dimba ratauna hai hadua towawine au rahanga Yerusale au Wou (21:9–22:5)
6. Kahopoa sura (22:6-21)